UGugu ujatshuliswa yimpumelelo yakhe
ZIYAMJABULISA izithelo zokusebenza ngokuphindiwe uGugu Zuma-Ncube, oyindodakazi kaMnu Jacob Zuma, owayengumengameli waseNingizimu Afrika, noDkt Nkosazana Dlamini-Zuma, ongungqongqoshe wezokubusa ngokubambisana nezomdabu. Ekhuluma neLANGA uGugu ongomunye wabanikazi beStained Glass, ekhiqiza imidlalo kamabonakude okubalwa Uzalo, i-Ehostela ne-Ifalakhe, uthe kuyamjabulisa ukuthi imidlalo ekhiqizwa yinkampani yakhe, iyaphumelela.
Uthi okumenza akujabulele kakhulu lokhu, wukuthi uhlale enengcindezi yokusebenza ngokuphindiwe ngenxa yempumelelo yabazali bakhe. “Ngeke ngikushintshe ukuthi ngizalwa ngobani, inkinga ngabantu ababa nemicabango yabo ngokuphumelela noma ngokuhamba kahle kwezinto zami.
"Ukuze ngikugweme lokho, kumele ngisebenze ngokuphindiwe, nginganaki ukuthi ngizalwa ngobani. Nangokuthi ngingowesifazane osemncane waseNingizimu Afrika, kuyaphoqa ukuba ngizinikele kukhona konke engikwenzayo,” kusho yena. Uveze ukuthi usebenza nethimba elizikhandlayo futhi elihlale liphokophele ukuphumelela nokwenza izinto zenzeke ngendlela efanele.
UGugu oqale ukuzakhela igama kulo mkhakha engumlingisi, uthi ukuba nenkampani ekhiqiza imidlalo kamabonakude, akuyona into elula njengoba benazo izingqinamba ababhekana nazo.
Uthi phakathi kwazo wukungakwazi ukuholela abalingisi imali abasuke beyifuna, okudalwa yiziteshi zikamabonakude ezibanikeza ibhajethi okumele bayilandele uma beqopha noma beholela abalingisi.
“Ngiyakuqonda ukuthi abalingisi kumele baholelwe imali ebafanele, kodwa okubuhlungu wukuthi sisebenza ngebhajethi okuyiyona esigadayo ngamaholo abalingisi. Yingakho ngingaphikisani nabo uma befuna ukuhola okungaphezulu kwalokhu esibanika khona, kodwa ngiyabachazela ukuthi yikhona esinakho ngokwebhajethi,” echaza.
Uthi abantu mabalindele eminye imidlalo emibili emisha ezobonakala ngonyaka ozayo kumabonakude, ezokhiqizwa yinkampani yakhe. “Nakuba ngingeke ngande kakhulu okwamanje, kodwa ngingasho ukuthi ngaphandle kokuthi liyabuya iHostela, kunemidlalo emibili esisebenzela phezu kwayo.
"Omunye kuzoba wumdlalo owuchungechunge, omunye kube ngoweziqephu,” kusho uGugu. Uphinde wacacisa nangamahlebezi ake asabalala ngomdlalo oshisa izikhotha kulezi zinsuku, i-Ifalakhe. Kuke kwasabalala ukuthi lo mdlalo yilona owagcina ubhuntshile obizwa ngoSelwa owawuzokhonjiswa kwiSABC 1.
Kwasolwa ukudliwa kwemali ngokubhuntsha kwawo. Uthe la mahlebezi kawanaso isisekelo njengoba le midlalo yehluke kakhulu.
“Kwangimangalisa ukuzwa la mahlebezi, i-Ifalakhe wumdlalo omusha ongakaze ube khona ndawo,” kusho uGugu olingisa indawo kaNyasha kulo mdlalo.
Uphethe ngokuthi nakuba ekhiqiza imidlalo kamabonakude, kodwa okuhamba phambili kuyena wukulingisa.