Abantu kuzomele babophe izifociya
UBANGWA nezibi umnotho waseNingizimu Afrika! Umbiko okhishwe yiStatistics SA ngasekuqaleni kwaleli sonto, ukhombisa ukuthi umnotho wakuleli waqumbeka phansi kusukela kuNtulikazi (July) kuya ekupheleni kukaMandulo (September).
Umnotho watheleka othulini ezinyangeni ezintathu zokuqala konyaka, kodwa wavuka kwezintathu kuya ekupheleni kukaNhlangulana (July).
Lo mbiko weStats SA ulandela isexwayiso se-International Monetary Fund (IMF) sangenyanga eyedlule yexwayisa uhulumeni wakuleli ngokuthi usushonelwa yilanga mayelana nemizamo yawo yokufukula umnotho. I-IMF ixwayise ngokuthi uhulumeni wakuleli kumele utatazele kakhulu ukwenza izaba zokufukula umnotho. Ithe uma wehluleka, leli zwe liyokwenganyelwa wumnyama ongenafu.
Izinga lokukhula komnotho wakuleli lehle kakhulu kanti nesimo senhlalo yomphakathi siyantenga kakhulu. Uma uhulumeni uluthatha ngamandla lolu daba, ungakwazi ukuhlomula esimeni sezimakethe zemali emhlabeni jikelele. Lesi simo sisakwenza kubelula ukuboleka imali kulezi zimakethe futhi zitholakala ngamanani asezingeni elingekho phezulu kakhulu.
Ukwehluleka wukwenza izinguquko ezidingekayo ukuze kuvuselelwe umnotho, kuyokwenza isimo semali kahulumeni sibe nzima futhi kuyokwenyusa inani abatshalimali abayolifuna uma uhulumeni ucela ukuboleka imali kubo.
Ongoti be-IMF bathi zintathu izingqinamba uhulumeni wakuleli obhekene nazo; eyokuqala wumnotho wakuleli obangwa nezibi, edalwa wukuhlehla kosomabhizinisi abasamile ekutshaleni imali yabo kuleli. Osomabhizinisi bakhala ngokuthi uhulumeni unemigomo eminingi engabaphilisi kahle.
Eyesibili, wukuntenga kwesimo semali kahulumeni osekudale ukwenyuka kwezindleko zokuboleka imali kubatshalizimali; eyesithathu, wukulengela eweni kwezinkampani zikahulumeni ezingakwazi ukuzimela, okudala ukuthi lezi zinkampani zehluleke wukufeza imisebenzi ezabekelwa yona.
Lokhu sekwenyuse izindleko zosomabhizinisi zokukhiqiza kuleli. Izinkampani zikahulumeni seziphenduke umthwalo kahulumeni ngenxa yokuthi zidinga uxhaso ngakwezemali.
I-Stats SA ibike ukuthi izimboni zomcebo ombiwayo yizo ezincishelwe kakhulu wumkhiqizo, zilandelwa ngamafemu akhiqiza izimpahla. Kwezokumbiwayo, izimayini ze- platinum, ezamalahle neiron ore (esetshenziswa ukwakha insimbi), yizo ezehle kakhulu.
Kwezamafemu akhiqiza impahla, kwehle kakhulu umkhiqizo wezenza insimbi, ezikaphethiloli, ezisebenza ngezingodo nezakha amaphepha. Ingxenye yomnotho wezokuthutha nowezukuxhumana (ehlanganisa nomakhalekhukhwini) nayo intenge kakhulu.
Izimboni zokuhwebelana, ezokuhlinzekwa kwabantu ngeziphuzo, wukudla neyezindawo zokulala (njengamahhotela), zona zikhombise ukusimama. Uma sekuhlanganiswa yonke imikhakha yomnotho, iStats SA ithole ukuthi umnotho wakuleli unciphe ngo-0.6% kusukela ngoNtulikazi kuya kuMandulo. Njengoba sesike sachaza kule ngosi ezinyangeni ezedlule, ngeke kube lula ukuthi uhulumeni utakule umnotho uwubeke ezingeni lokukhula ngesivinini.
Lokhu kuzodalwa wukuthi izinguquko eziningi ezidingekayo ngeke zamukeleke kalula kulabo abazolahlekelwa yimibele abancela kuyo manje. Noma yiluphi uhlelo lwezinguquko ludala izinhlobo ezimbili zabantu; abahlomulayo ngenxa yezinguquko nalabo abalahlekelwa ngamathuba okuzisengela.
Uma senza umzekelo, ukuvuselelwa kwe-Eskom kuzoba nomthelela omuhle emnothweni wakuleli, oyodalwa wukuthi abatshalimali bazoba nesiqiniseko sokuthi uma bevula izimboni zokukhiqiza kuleli bayokwazi ukuthola ugesi owenele. Ngakolunye uhlangothi, ingxenye yezisebenzi zakwaEskom isengcupheni yokulahlekelwa yimisebenzi, ngakho-ke uhulumeni kumele uncenge izisebenzi ukuba zingalwi nezinhloso zawo zokuvuselela i-Eskom.
Kawekho nokho amathemba atheni ngonyaka ozayo.
Umhlahlo wezangoma ze-IMF ukhomba ukuthi umnotho wakuleli usazophefumula kanzima ngonyaka ozayo. Kulindeleke ukuba ukhule ngezinga elingaphansi kokwanda kwabantu abakhele leli zwe.
Ongoti kwezomnotho bathi lokhu kudala izinkinga. Enye yalezi zinkinga wukuthi ingxenye yezakhamizi efuna imisebenzi ngeke iyithole. Unyaka ozayo uzoba ngowesi-6 lapho umnotho wakuleli ukhula ngezinga elingaphansi kwelokwanda kwabantu.
Uma umhlahlo wezangoma zeIMF ufezeka, ukwanda kwabantu abantula imisebenzi kuyokwandisa ubuphofu kuleli.Konke lokhu kukhomba ukuthi unyaka ozayo kawuzi nezindaba ezinhle. Bonke abantu kuzomefanele babophe izifociya.