SIGUDLA NOGALAKAJANA
Kunensizwa engibuze ukuthi ngizozithenga yini izimpahla zikaKhisimusi, ngayitshela ukuthi mina kanginayo ingane ebizwa ngoKhisimusi, ngakho-ke ngeke ngithengele izingane zabantu engingazazi, leyo ngane mayicele uyise ayithengele okokugqoka.
Lo mbhemu uthi yena izingane zakhe zingambulala uma engazithengeli izimpahla zikaKhisimusi. Le nto yokuthengela izingane izinto zikaKhisimusi kangizange ngiyiqondastende nje kwakudalo. Sisakhula thina abantwana babethengelwa ngalesi sikhathi, ngoba abazali babengenamali unyaka wonke, kuthi-ke ngoDecember uma bethola amabhonasi, bakhithize.
Namuhla abantwana bathengelwa izimpahla unyaka wonke, ngakho-ke ezikaKhisimusi kazisadingeki. Kuthiwa phela uKhisimusi wusuku lokuzalwa kukaJesu wamaKrestu, kodwa kangikaze ngizwe kushiwo naseBhayibhelini ukuthi yona le Nkosi yamaJuda yayithenga izimpahla ezintsha ngoDecember.
Lolu wusiko olweza nabelungu kanti-ke nathi sangena sathi shiqe kulo, sibe singazi nokuthi lokhu kwenzelwani. Umuntu ufike athenge akhithize ngoDecember, bese kuthi uma kufika uJanuary ayoboleka imali komashonisa ukuze athenge izimpahla zesikole.
Lapho akusekho ngisho imali yokuthenga impuphu yodwa le! Abelungu bona bathanda ukuya emaholidini ngemali yesikweletu ngoba nabo befuna ukufana nomakhelwane abanemali.
Abantu abampisholo basakholelwa ekutheni abelungu banemali edlula eyethu kanti siyafana nje, kunabanemali nabaswele njengoba kwenzeka nakithi. Emalokishini wawuthola umuntu ethenga ifenisha, iziqandisi nemisakazo yodumo ngoba nje efuna ukuchomela omakhelwane.
Wawubona ngezimoto ezidilivayo zingena ziphuma, ubone omakhelwane bephenya amakhethini bebuka ukuthi zima kumuphi umuzi. Lithi lishona ilanga kube sekwazi ilokishi lonke ukuthi ubani uthengeni.
Kuthi uma kufika uJanuary abantu bafune omashonisa lapho bengakhona. Umuntu useyokhokha isikweletu size simhlule, izitolo zithumele zona leziya zimoto ukuthi zilande ifenisha, omakhelwane baphenye amakhethini futhi bebheka ukuthi zima phambi kwamuphi umuzi.
Kuyothi lapho ikhishwa ifenisha, baze baphumele ngaphandle ukuze phela ubone ukuthi bayabona. Lapho sebekuhleba ubabuka, bebuza ukuthi: “Kodwa ubethi wenzani?” Wena lapho kawusaphumi nokuphuma endlini, usucashe ngomnyango, ususaba nokubonwa. Kuleyo nyanga uphenduka undabizekwayo elokishini.
Uthi uyaphuma uya emsebenzini, ubone bekukhomba, bekhulumela phansi. Kukhona labo MaMgobhozi abangenamahloni abavele bakuqonde ngqo babuze ukuthi: “Hhawu, sibone imoto ilanda ifenisha laphaya kwakho, ngabe uyayishintsha yini?”
Bakubuza nje, bazi kahle ukuthi idliwe ngoba wehlulwe yisikweletu. Nawe-ke lapho ubindwe wulimi, ubike imbiba ubike ibuzi, uzame ukuqamba amanga.
“Hhayi, angiyithandanga leya, ngithe abangibhekele enye,” sekusho wena sengathi uyithenge uvale amehlo. Abayaziyo imali bayayihlonipha, kanti izinto abazifunayo bayahlela kahle bonge imali ize iphelele, besebeyazithenga.
Le nsizwa ebeyingibuza ngezimpahla zikaKhisimusi, yona ithengele ingane yayo enezinyanga ezimbili izimpahla ezinamagama. Ithe ifuna ukuthi ithi uma iyokoza ingane, iyokozele egameni elaziwayo. Uma iyokozela ibhibhi leNike, lapho kubhalwe khona ukuthi “just do it”, izokwazi ukuthi akumele ibuze muntu, kumele imane yenze njengoba ilebuli isho. Thina uma sithengela izingane, siya ezitolo zamaShayina, sifike siwole nje kugcwale ubhasikidi ngoba phela izinto zishibhile. NgoJanuary sizobe sisahleka njengoba sihleka nje ngoDecember, singenankinga.