KULINDELWE ABASUBATHI ABANINGI KWI-ILLOVO 15KM
KUZOGUGA iteku kubasubathi baKwaZulu-Natal kwi-Illovo 15km Christmas Challenge ezokuba ngeSonto kusuka ngo-6 ekuseni eWestville, eThekwini.
Lo mjaho ohlelwe yiWestville Athletics Club, uzokube ugubha iminyaka ewu-26 wasungulwa kanti uhambisana nebanga labahambayo. Lo mjaho ungomunye wekhonzwe kakhulu ngabasubathi yize unemiqansa enzima.
Abadidiyeli balo mjaho bathe balindele abasubathi abangaphezulu kuka-3000 kwazise unemiklomelo eminingi yamakilabhu eyahlukene.
U-Allen Hattingh ongomunye wabadidiyeli balo mjaho, uthe nanonyaka bazokube benayo imiklomelo yamakilabhu ebizwa ngamabhasi. Kule miklomelo kukhona iFriendliest Bus, iMini Bus neLondon Floating Trophy.
“Abasubathi abazokwenza kahle bazothola imiklomelo yemali, izindondo, izikibha neminye eyahlukene. Abafuna ukubamba iqhaza kulo mjaho bangangena kwi- website ethi: www.eventtiming. info kanti imingenelo sizoyamukela ngosuku lwalo mjaho. Amakilabhu afuna ukufaka amatende angakwenza lokho ngoMgqibelo,” kusho u-Hattingh.
Abafuna ulwazi ngalo mjaho bangaxhumana noHattingh kwethi: 083 440 3135 noma uSharon Schubach kwethi: 082 414 1783.
Kusenjalo, kubhekwe lukhulu kubasubathi baseNingizimu Afrika kwi-IAU 50km ngoMgqibelo eNigeria.
Lesi sikwati sizokube simelwe ngabasubathi ababili bePhantane uSanelisiwe Mbanjwa noMahlomula Sekhonyana abasanda kungena endaweni yesine kwiSoweto nakwiComrades Marathon ngokwahlukana.
IKwaZulu-Natal izokube imelwe ngabasubathi abane kulo mqhudelwano.
Abanye nguThobile Mbolekwa noMthokozisi Mazibuko kanti umqeqeshi weqembu nguXolani Mabhida osanda kuhlomula ngomklomelo wokuba ngumqeqeshi ovelele kwiKZN Sport Awards waphinde waqokwa kumaSouth African Sports Awards.