Uvalo 'ngeziqhwaga' zaseMorocco kwiDowns
UMosimane ukhale ngaphansi ohlwini lweCaf
INGEBHE kuPitso “Jingles” Mosimane ongumqeqeshi weMamelodi Sundowns ngaphambi komdlalo omqoka wale kilabhu neWydad Casablanca yaseMorocco ka-group C kwiCaf Champions League ozokuba ngoMgqibelo ngo-20h00 eMohammed Stadium, kulona leliya lizwe.
IDowns iya kulo mdlalo nje, isiqale kahle isigaba samaqoqo inenebula iPedro de Luanda Atletico yase-Angola ngo-3-0 ngeledlule ePretoria.
EzikaMosimane zibhekise amabombo eMorocco ngoMsombuluko ukuze zibe nesikhathi esanele sokulungiselela lo mdlalo.
UMosimane uthi ubona ingozi kule kilabhu njengoba bengahoshelani kahle nayo.
“Sesiphenduke izimbangi ezinkulu neWydad ngoba njalo siyahlangana nabo kulo mqhudelwano.
"Into enginovalo ngayo wukuthi bangavukwa yilobu buqhwaga babo basinike umdlalo omuhle. Kodwa-ke sesibadala kulo mqhudelwano ukhakhayi lwethu seluqinile.
"Silindele noma yini kubona, okuhle wukuthi nabo basazoza kithina,” kusho uMosimane.
Uthi bazozama ngawo wonke amandla ukubuya nokuthile kulo mdlalo.
Lo mqeqeshi ukhuluma ngokuqina kokhakhayi nje, ukhale ngaphansi ohlwini lokugcina lwabaqeqeshi abazovotelwa njengabahamba phambili e-Afrika. Abaqeqeshi abangenile kuMoine Chaabani, uNicholus Dupuis, u-Alioce Cicce, uChristian Gross noDjamel Belmadi.
Kulo mdlalo kulindeleke ukuba kushaye ibuya uHlompho Kekana ongukaputeni weDowns emuva kokudonsa isigwebo semidlalo emine ngokududula unompempe bebhekene ne-AS Otoho yaseCongo eyabehlula ngo-2-1 ngoNcwaba (August) nonyaka.
KoweCaf Confederation Cup, iBidvest Wits izobhekana neDjoliba yaseMali koka-group C ngeSonto ngo-16h00 kulo leliya lizwe.
UZOSHESHE ufike uKhisimusi kubalandeli beKaizer Chiefs ezodudulana neBloemfontein Celtic emdlalweni we-Absa Premiership ozokuba ngoMgqibelo ngo-20h15 eMoses Mabhida Stadium, eThekwini.
IChiefs nabakwaVodacom, bazovakashela abalandeli kusasa ngoLwesihlanu emini eWorkshop enkabeni yeTheku.
Abalandeli bazohlomula ngemikhiqizo eyahlukene yakwaVodacom. Abalandeli bazophinde bahlomule ngamathikithi okubuka lo mdlalo obhekwe ngabomvu eThekwini. Lapha kuzokube kukhona abadlali abathile bale kilabhu ezihola phezulu kwi- log yePremiership.
Ngakusasa ngoMgqibelo, ithimba leChiefs lizokube likhuthaza umphakathi ukuzivocavoca nokuphila impilo ehlanzekile.
Lizosingatha imidlalo yama- aerobic kusukela ngo-8 ekuseni kuze kushaye u-14h00 phambi kwaseLangeni Hotel egudle ulwandle eThekwini.
Abadlali bazokube bezivocavoca nabalandeli. Lolu hlelo iChiefs ilwenza ngokubambisana noMnyango WezeMpilo kuzwelonke nowesifundazwe. Umphakathi uzothola ithuba lokuhlolela izifo ezahlukene.
UJabulani Mbanjani wethimba lezokukhangisa kwiChiefs, uthi konke lokhu bahlose ngakho ukubusisa abalandeli beChiefs abaphuma ngobuningi nxa ibalethele imidlalo eThekwini.
Uthi konke kuzophothulwa ngokuthi iChiefs ithathe amaphuzu amathathu bese beqinisekisa ukuthi basonga unyaka ka-2019 behleli phezulu kwi- log. Uthi iChiefs ilethe ukhisimusi kubalandeli bayo baKwaZulu-Natal.