UFUNA UKUQINISA AMABHAWODI AXEGAYO OWE-RICHARDS BAY FC

USEJAHE ukuvulwa kwewindi u-Ian Palmer ( osesithombeni) ongumqeqeshi weRichards Bay FC ofuna ukuqinisa isikwati sakhe akholwa wukuthi sinamabhawodi axegayo.

IBay FC izovovana inkani neRoyal Eagles koweGladAfrica Championship ngoMgqibelo ngo15h30 eChatsworth Stadium, eThekwini. Lo mdlalo ungomunye wethathwa njengenzima kwazise womabili la makilabhu athola imiphumela emibi muva nje. Emdlalweni wokugcina kwiligi iBay FC itaxwe yiMbombela United ngo-4-0 kwathi i-Eagles yadliwa ngo-1-0 yiSteenberg United ekuhambeni. UPalmer uthi udinga abadlali abambalwa abanesipiliyoni.

UPalmer usemnkantshubomvu kulo mkhakha kwazise useke wayibamba nakwi-Absa Premiership.

“Nginabadlali abaningi abayibamba endaweni eyodwa okwenza kubemqoka ukuba ngithole nabanye kwezinye izindawo engikholwa wukuthi ziyaxega. Kangiyena umuntu oyigwala, ngiyayithanda ingcindezi. Okuhle wukuthi ngiya emdlalweni weEagles kuvunguza umoya wobunye kubadlali. Abadlali sebeyazi ukuthi ngidingani kubona.

“Ngiyakuzonda ukuhlulwa. Ngibadonse ngendlebe abadlali ukungayithathi kancane i-Eagles ngoba nakhu isendaweni embi,” kusho uPalmer. Nokho akathandanga ukuphumela obala ngabadlali afuna ukuqinisa ngabo uma sekuvulwe iwindi lokusayinisa abadlali abasha. UNkoto Masoabi obegijima kwiReal Kings ungomunye wabajima neBay FC.

IFree State Stars igcine iqashe uMilton Dlamini njengomqeqeshi omusha ongene esikhaleni sika-Vladislav Heric okhonjwe indlela.

Isiyonke imidlalo yeGladAfrica Championship ihlelwe kanje:KUSASA NGOLWESIHLANU E-Athlone Stadium: Ajax Cape Town vs JDR Stars 15h30.

NGOMGQIBELO

EChatsworth: Royal Eagles vs Richards Bay 15h30.

KaNyamazane: Mbombela United vs Real Kings 15h30.

EDobsonville: Swallows FC vs Pretoria University FC 15h30.

Kabokweni: TS Sporting vs Cape Umoya United 15h30. NGESONTO EThohoyandou: Tshakhuma Tsha Madzivhandila vs Free State Stars 15h30.

EKameelrivier: TS Galaxy vs UThongathi FC 15h30.

E-Olen Park: Jomo Cosmos vs Steenberg United 15h30.