INKOSI YAMAQADI IMANGALELWE KUMVIKELI WOMPHAKATHI
BUZULELWA ngamanqe ubukhosi beNkosi yamaQadi, uMqoqi Ngcobo, ngenxa yesimangalo selungu lebandla lamaNazaretha eliyifake kuMvikeli woMphakathi, liyisola ngokwephula umthetho obusa amakhosi aKwaZuluNatal owavimbela ukuba angadali ingxabano emphakathini.
UMnu Nkululeko Mthethwa, obengumkhulumeli wohlangothi lwaseThembezinhle okumanje usengumkhulumeli webandla lamaNazaretha aseBuhleni ngokuvunwa yinkantolo, utshele ILANGA ngeledlule ukuthi usenesiqiniseko sokuthi uMvikeli woMphakathi, u-Adv Busisiwe Mkhwebane, uzokhipha isinqumo.
Uthi yiyona ebe yimbangela yokuxova ibandla lamaNazaretha aseBuhleni, isebenzisa isikhundla sayo sobukhosi ngendlela ephambene nomthetho obusa amakhosi.
UMnu Mthethwa ululanda udaba athi: “Ngo-2012 ngifake udaba kuMvikeli woMphakathi (kusengu-Adv Thuli Madonsela) ngicela ukuba kuthathelwe izinyathelo iNkosi Ngcobo ngokuxova ibandla ngesenzo sayo sokwephula umthetho obusa amakhosi, owavimbela ukuba angadali ingxabano emphakathini.
“Udaba lwalinda ukuba inkantolo ikhiphe isinqumo ngodaba lombango wobukhosi bamaNazaretha obuphakathi kweNkosi Vela “Misebeyelanga” Shembe (engasekho) neNkosi Mduduzi “Nyazilwezulu” Shembe.
“Kuthe uma inkantolo eNkulu yaseThekwini ivuna uhlangothi lwaseThembezinhle ngo-2016, ezoNyazi zaledlulisa icala laya eNkantolo eNkulu yaseMgungundlovu, nakhona zakhala ngaphansi njengoba zize zayobhajwa eNkantolo yokuDluliswa kwamaCala eBloemfontein.
“Yiyona-ke eshaye isigxivizo esinqumeni seNkantolo eNkulu yaseMgungundlovu - ivuna ezaseThembezinhle - njengoba sekwaziwa ukuthi ekugcineni isenzo seNkosi Ngcobo sichithwe yizo zontathu lezi zinkantolo.
“Ngibe sengibuyela komele umvikeli womphakathi lapha eThekwini, uMnu Vusi Sikhakhane ngoLwesibili (olwedlule), ngamcela ukuba basheshe bakhiphe isinqumo kusashisa nje, mayelana nokuthi iNkosi yamaQadi igudluzwe ebukhosini ngoba iphambane nomthetho ebusa ngaphansi kwawo.
“Ngikwenze lokhu ngazi ukuthi akuselula ukuba iNkosi Ngcobo ilufake enkantolo lolu daba emuva kwezinqumo zezinkantolo ezinkulu ezintathu, zonke ezivumelene ngokuthi yadala ingxabano ebandleni lamaNazaretha ayenokuthula emuva kokukhothama kweNkosi Vimbeni “Thingolwenkosazane” Shembe ngo-2011,” kusho uMnu. Mthethwa.
Icelwa ukuba iphawule iNkosi yamaQadi, ithe: “Ngingajabula kabi uma uMvikeli woMphakathi angangibiza ngiyoziphendulela bukhoma, kodwa ngiyamxwayisa (uMnu Mthethwa) ukuba abhasobhe ngingatholwa ngingenacala ekubeni bona sebewine icala kwathiwa liyasilahla.”
Ngesikhathi sokuloba besisalinde isiqiniseko ehhovisi loMvikeli Mphakathi sokuthi ngabe ufikile ngempela yini uMnu Mthethwa ngoLwesibili. Sibathumele ubhalonyazi ( e-mail), kodwa kuze kwashaya isikhathi sokuloba ingabuyile impendulo.
Kuzokhumbuleka ukuthi ngosuku lomfihlo woThingolwenkosazane, iNkosi Ngcobo yasukuma yaphakamisa igama loNyazi njengenkosi yamaNazaretha aseBuhleni. Yathi yedlulisa izifiso zoThingo olwazitshela yona ngomlomo. Yenza okwaphikisana nokwashiwo ngowayengummeli woThingo, uMnu Zwelabantu Buthelezi, owaveza ukuthi uThingo luqoke iMisebeyelanga ngencwadi esayinelwe. Nokho-ke abantu babamba elentulo ngoba okwashiwo nguMnu Buthelezi, kwafana nokuthela amanzi emhlane wedada.