Isilo sihlabe utshwala
"Yiliphi izwe elizotshala imali ezidakweni"
SIGXEKE ukwanda kwezikhangiso zotshwala iSilo samaBandla, uGoodwill Zwelithini kaBhekuzulu, ngesikhathi sigubha iminyaka ewu-48 sihola isizwe sikayise emcimbini obusesigodlweni saso, KwaKhethomthandayo, KwaNongoma, ngoMgqibelo, obuthanyelwe yimbijana yabantu.
Kugcine kuvele ukuthi okuholele ekubeni izihlalo zibe ziningi kunezethameli, wukungahleleki kwezinto njengoba ebengekho ngisho amabhasi abehambise amabutho nezethameli nje jikelele.
Kuze kwaphoqa ukuba uNdunankulu kaZulu, iNkosi Mangosuthu Buthelezi, icele abantu ukuba basondele ngaphambili njengoba beziziningi izihlalo ezingenamuntu.
Cishe zonke izikhulumi ebezisohlwini okubalwa kuzo usihlalo wendlu yabaholi bomdabu KwaZulu-Natal, iNkosi Phathizwe Chiliza, naso iSilo uqobo, bakugxekile ukungathathelwa phezulu kwalo mcimbi.
Yize kunjalo, ugcine uqhubekile umcimbi, kanti iSilo siphathise umyalezo etsheni mayelana nobungozi bokucwila ezinkambeni zikaFaro.
Sithe kushayisa ngamahloni ukubona ngisho izikhangiso kumabonakude qede kuvele intsha - ikakhulukazi yesifazane - namabhodlela otshwala.
“Uma ungabheka lapha eNingizimu Afrika kugcwele inqwaba yamajoyinti, kalikho izwe elinezidakwa njengeNingizimu Afrika. Uze ubone nezikhangiso kuvele amafriji eshunqa intuthu bese kuvela amabhodlela abandayo, usethuswe yilokho, bese kuvela abesifazane.
“Lokhu kuyihlazo, ngicela siyibheke le nto. Benginezivakashi nenxusa lase-USA elifike kimina laze lacela ukuthatha isithombe limi eduze kwesibaya. Lezi zivakashi zibuze nangezinhlelo enginazo, ngazikhombisa, konke lokhu ngenzela nina. Uma kuqhubeka kanje, yiliphi izwe elizotshala emali ezidakweni?” kusho iSilo.
Sixwayise abantu ngokuthi baqaphele ukulandela abefundisi abaqhamuka kwamanye amazwe, abagcina sebethinteka emacaleni okudlwengulwa kwezingane.
“Kuyangixaka ukuthi umlalela kanjani umuntu ethandaza ngolimu lwakhe ongaluzwa; inkinga eba khona wukuthi izingane zigcine zidlwengulwa,” kusho iSilo.
INkosi Buthelezi ithe kuyisibusiso esimangalisayo ukuba uNkulunkulu alondoloze iNgonyama iphathe isikhathi eside kangaka.
ISITHOMBE NGU: SABELO MASUKU