BAKHALA NGELAYISENSI YENSANGU EBIZAYO
BAKHIHLA eseNkosazana yaseLangeni, uNandi, abalimi abasafufusa, abangaphansi kukaMasipala waseNdwedwe, abafisa ukuhweba ngensangu njengoba kuvela ukuthi ukuthola ilayisensi yakhona kumba eqolo.
Lokhu kugqame ngesikhathi lo masipala unomcimbi wokunikela ngogandaganda, amageja namabhuzu okulima kubalimi abanemifelandawo, obuseNtola, eNdwedwe, ngoMgqibelo.
Ekhuluma kulo mcimbi uMnu Khonza Ngidi, ongusomlomo kulo masipala, uthe bazimisele ngokubaxhasa abalimi ekutshaleni insangu, bathole nelayisensi yokuhweba ngayo njengoba sekuvelile ukuthi iwusizo emakhambini elapha izifo ezahlukene nasekwakheni izimonyo zokugcoba.
“Sinenhlanhla enkulu-ke eNdwedwe ngoba umhlaba sinawo. Amakhosi akithi, okuyibo abanikazi bomhlaba, sisebenzisana kahle nawo njengoba ehlala evule izandla uma sifisa ukusebenzisa umhlaba. Inselelo esibhekene nayo ngeyokusiza abalimi bakithi bemifelandawonye ukuba bayithole le layisensi emba eqolo, njengoba kuthiwa iwu-R700 000. Sizimisele njengomasipala ukusebenzisana nabo baze bathole izimvume ngokulekelelwa wuhulumeni wesifundazwe,” kusho uMnu Ngidi.
UMnu Ricardo Mthembu, oyilungu lesiShayamthetho KwaZulu-Natal, uthi bewuhulumeni bayaweseka kakhulu uMasipala waseNdwedwe ngegxathu olithathile ukusiza abalimi bakwazi ukutshala insangu.
“Abalimi nabo kumele balisebenzise ithuba elifana naleli, ngoba lizosiza ukudala amathuba emisebenzi, ikakhulukazi entsheni. Uma sikhuluma ngoguquko kwezomnotho ( Radical economic transformation), sifuna abantu bayeke ukufudukela amadolobheni bayofuna imisebenzi kodwa badale amathuba emisebenzi lapho bekhona, bafake isandla ekufukuleni umnotho wakuleyo ndawo abayakhele.
“Esikukhuthazayo wukuba abantu bayitshalele ukuthuthukisa umnotho nokudala imisebenzi insangu, hhayi ukuba bayibheme. Siyazibophezela nathi siwuhulumeni ukuthi sizosebenzisana noMasipala waseNdwedwe ukusiza abalimi bawathole la malayisensi okuzisebenza,” kusho uMnu Mthembu.
Engqungqutheleni ebizwa ngeCannabis lnvestment Protocol ebiseNkosi Albert Luthuli International Convention Centre ngenyanga edlule, uNgqongqoshe wezokuThuthukiswa koMnotho KwaZulu-Natal, uNkk Nomusa Dube, uveze ukuthi ucwaningo lukhombisa ukuthi imboni yensangu ingenza inzuzo ewuR-100 billion ngonyaka.
Uthe iKwaZulu-Natal yiyona esemathubeni amahle okukhiqiza insangu eningi ngenxa yesimo sezulu esivuna ukukhiqizwa kwayo.
Kuzokhumbuleka ukuthi lesi sihlahla sesiphenduke intandokazi, uhulumeni usuhamba uhlabelela ngaso nje, kusukela emuva kwesinqumo seNkantolo yoMthethosisekelo sangomhla ka-18 kuMandulo (September) 2018 sokuthi akulona icala uma umuntu omdala ezitshalela intshokovane futhi eyisebenzisa kwakhe.
Lesi sinqumo sakhishwa emuva kodaba olwafakwa eNkantolo eNkulu yaseCape Town nguMnu Gareth Prince, uJonathan Ruben noMnu Jeremy Acton ngo-2017.
IJaji Dennis Davis lanquma ukuthi ukuvinjwa kwabantu abadala ukusebenzisa umthunzi wezinkukhu ezindaweni zabo zangasese (emizini yabo) kuphambene nomthethosisekelo.
Udaba lwadlula lwaya eNkantolo yoMthethosisekelo eyanquma ukukhulula intshokovane emuva kweminyaka ewu-95 inuka iqaqa, emuva kwesimemezelo esakhishwa ngo-1923 ukuthi ingalokothwa.
Sinenhlanhla enkulu-ke eNdwedwe ngoba umhlaba sinawo.