Ongoti bezempilo bahlaba eyotshwala obungadakani
SIYANDA isibalo sabantu abazama ukuphuza utshwala "obungadakani" ( alcohol free) ngoba bezama ukuhambela kude nezimbiza zikaFaro futhi bengafuni ukubonakala sengathi bona kabekho ezintweni.
Ngokusho kwabe-health24, eNingizimu Afrika baningi abantu asebelandela lesi sitayela. Ithi leli lizwe lisendaweni yesithupha kwahamba phambili ngokunklunklwa kotshwala.
Yize kunjalo, kuthiwa bakhona abaqoma ukuziphuzela iziphuzo ezingenabo utshwala, kodwa zibe zibukeka sengathi zinabo. Lokhu kuthiwa kusiza kakhulu labo abafuna ukuyeka utshwala njengoba kuthiwa seziziningi nezinhlobo zophuzo abantu abangazikhethela kuzona.
Ngisho komabonakude, sekujwayelekile ukubonakala izinkampani ezikhiqiza utshwala, zikhangisa ngotshwala obungadaki. Yize kunjalo, ongoti bezempilo bathi kakujwayelekile ukuba lobo tshwala bugcine bungenaso isithako esidakayo yize bubhalwe u-00%.
Bathi lobu tshwala buyingozi kakhulu kubantu abanenkinga yokuphuza ngokweqile uma bethi bazoyeka ukuphuza, bakhethe lolu hlobo lweziphuzo.
NgokweLiquor Products Amendment Bill ka-2016, isiphuzo esikhangiswa ngokuthi siwutshwala obungadakani, sisuke sinabo utshwala obuwu-0.5% noma ngaphansi.
UMnu Rhys Evans, ongumqondisi ophethe kwa-ALCO-Safe - okuyinkampani esabalalisa amathuluzi okuhlola izidakamizwa ezinamandla notshwala - uthi izinkampani eziningi zisuke ziqamba aluhlaza uma zithi isiphuzo lesi kasinabo utshwala, kwazise busuke bukhona obuwu0.3 kuya ku-0.5%.
“Kunamawayini amaningi okuthiwa kawanabo utshwala, kodwa asuke esenabo, kuphela nje wukuthi asuke enziwe into ebizwa nge- de-alcoholised, okufana nekhofi eli- decaffeinated kodwa lisuke lisenayo i- caffein encane,” kusho uMnu Evans.
Ngokwabe-University of Wisconsin Hospital and Clinics Liver Transplant Program, ukuphuza iziphuzo zalolu hlobo kunomonakalo eziwenzayo esibindini, kanti bathi bona njengesikhungo, bakhuthaza abantu ukuba bahambele kude notshwala okuthiwa kabudakani.
Njengoba amaphesenti kulobu tshwala ephansi kangaka, kuthiwa ngisho ungabuphuza kangakanani, kodwa kabuveli uma ufuthiswa ngamaphoyisa omgwaqo, kodwa uma ungaphuza amakani (330 ml) awu-20 eSavanna Non-Acoholic ngehora elilodwa, ngeke usadlula emaphoyiseni ngoba ungabe seweqile isibalo esidingekayo.
Ngokusho kwabeBusiness Insider, yikho kanye lokhu okuholele ekubeni uhlaka olwengamele ezokukhangisa, luphoqe izikhangiso zalolu hlobo lweziphuzo ukuba zikuveze ukuthi uma usuzidle kakhulu lezi ziphuzo ngesikhathi esifushane, nazo ziyingozi.
Ngokusho kukaMnu Evans, ukuzama ukuphephela kulezi ziphuzo zotshwala kodwa okuthiwa kazidakani, kuyingozi kakhulu kubantu abanenkinga yotshwala (alcoholics) nabazama ukubuyeka kwazise zingabenza bahalele kakhulu utshwala obudakanayo.
“Ngisho isibalo esincane sotshwala siyingozi kumuntu onale nkinga ngoba ukuphuza ngokweqile kusuke kungaseyona into yokuphuza nje kuphela, kepha kusuke sekuthinteka nomqondo wakho imbala, okungenza kube nzima ukuba ukwazi ukubuyeka uma uzophinde uphuze lolu hlobo lweziphuzo,” kusho uMnu Evans.
Uthi lowo onenkinga yotshwala nokuphuza ngokweqile, indlela lobu tshwala obunuka ngayo, yindlela ibhodlela elakhiwe ngayo, kungenza lowo agcine esephuza utshwala okwangempela.