Amahlaya akhe asemenze isilomo
UMahlase uthi awukho umhlalalaphansi kwezobuciko
USEPHENDUKE isilomo kubalandeli bakhe ezinkundleni zokuxhumana umholi weqembu lomculo wombhaqanga, oMapendane, uZeblon “Mahlase” Sibisi (58) ngeziqeshana zamahlaya ezigqame kulezi zinkundla ngoMark Engel odlala nentombazanyana engu-Emmanuella baseNigeria.
Muva nje kubhoke umfanyana obizwa ngoLusanda “Luh” Mahlaba.
UMahlase ozinze eVillage, eChatsworth, eThekwini, kodwa odabuka eGlendale, KwaDukuza, uthi akumtheni amandla ukuthi indlela eya empumelelweni kwezobuciko kayikhanyi yize iminyaka isihambile.
Usanda kuqopha ingoma yegqom’ enezinhlamvu ezikhuluma ngoKhathaza - ongumlingiswa kaSibonelo Ngubane - odlala kuZalo olukhonjiswa kuSABC 1 ngo-20h30 kusukela ngoMsombuluko kuya kuLwesihlanu.
Le ngoma uyicula nentokazi enguNosipho “Nocy Dee” Dlamini.
UMahlase ujabule wafa ngeledlule ehlangane noKhathaza.
“Kayithathwa impesheni ebucikweni. Uma uthi uyiciko ngoba nakhu ufuna imali, uzoba nenkinga ngoba uzongayitholi bese uthi uyayeka, uthatha ‘umhlalaphansi’ kwezobuciko.
“Ubuciko yinto esegazini, oyenzela ukukhulula imizwa yakho neyabantu abasuke bekubuka noma bekulalele, imali-ke usungayicabanga uma ubuciko bakho sebukujabulisile wena nezibukeli zakho. Yingakho-ke mina ngisaqhubeka ngijabulisa abantu futhi kangidingi ukuba ngize ngibe ngusaziwayo wakomabonakude ukuze ngijabulise abantu, lokho kuyozenzekela uma uNkulunkulu evumile.
“Uma kungenzeki, kuyobe kungasho ukuthi mangiyeke into ethokozisa umphefumulo wami,” kusho uMahlase.
Uthi ukuyibamba yize iminyaka isihambile ugqugquzelwa ngomakadebona abangasekho nabasekhona kwezobuciko. Abanye badala kunaye. Ubale uVusi Ximba, uChris April, ongumlingisi, no
Nomhle Nkonyeni, odlule emhlabeni kulo nyaka esayibambile kwezokulingisa, nabanye.
“Ngeke phela ngaliphosa ithawula, ngoba kulo mkhakha wobuciko kuye kubhalwe imidlalo ngempilo yabantu abawumndeni. Akuyona yonke imindeni engenabo ogogo nomkhulu njengoba sesibona kuvamile emidlalweni kamabonakude. Ngifuna ukuthi nakontangayethu, uma nje bekwezobuciko, kalikashoni ilanga.
“Ubuciko-ke akukhona ukuthi umuntu avele phambi kwekhamera, uyaba nangemuva kwayo. Ngifisa sengathi nontanga yethu asebeke bathola ithuba lokuvela emidlalweni kamabonakude, kodwa osekunesikhathi bengasalitholi ithuba, bangakhathali ngoba uma kukhathala bona, kuyoba njani kwabasafisa ukuvela?
“Ngiyafisa nokuthi abantu baseNingizimu Afrika bazithande izinto ezivutshelwe kuleli, kodwa-ke nabavubeli phela mabavubele ingqothovu, hhayi nje ukugcina icala,” kusho uMahlase oncoma umfowabo omncane, uSbongiseni Sibisi, onguprojusa wakhe.
“Ungisiza kakhulu ngokunginika ugqozi. Izinto eziningi zobuciko ngizenzelwa nguyena, futhi unguphrojusa wami womculo. Indlela enza ngayo, ingenza ngibone ukuthi kubalulekile ukuthi ngisho umdala, ubahloniphe abantu abancane kunawe ngoba kuyenzeka bakunike umbono ongabeka isinkwa etafuleni,” kusho yena.
Uthi abantu bahlale bemshayela bebonga ukuthi uyalekelela ekutheni bachithe isizungu ngalezi ziqeshana zakhe zamahlaya.