Ibanjwe inkunzi emini iRichards Bay FC
Unondweba ubeke amaphenathi asolisayo
IBANJWE inkunzi kubuka izwe lonke iRichards Bay egijima kwiGladAfrica Championship abalandeli bekilabhu ebibhekene nayo baphuma bebambe ongezansi bengakholwa ngabakubonile.
IBay ihlulwe ngo-3-1 yiRoyal Eagles koweGladAfrica Championship ngoMgqibelo ntambama eChatsworth Stadium. Amagoli e-Eagles ashaywe nguMpho Khumalo namabili kaKhanyisa Mayo obekungamaphenathi.
EleBay lona lishaywe nguGift Radebe. Lo mdlalo ube neziwombe ezithusayo ebezenziwa ngunondweba uKhulasande Qongqo obephethe umdlalo.
Womabili amaphenathi e-Eagles ashiye abalandeli bayo uqobo bebambe ongezansi bengakholwa ngabebekubona. Eyokuqala umdlali weBay uVeluyeke Zulu ushayisane nomdlali we-Eagles ngehlombe unondweba wathi yiphenathi.
Eyesibili uBafana Dlamini weBay umake umdlali we-Eagles engaphandle kwebhokisi wayowela ebhokisini unondweba wathi uwele ngaphakathi.
Kwale ngisho umsizi wakhe emtshela ukuthi ubengaphandle kodwa uQongqo wathi ubengaphakathi. Lo nondweba ushaye uvala umdlali we-Eagles evimba ngezandla ibhola esebhokisini kodwa wazithulela.
Abalandeli be-Eagles abebeyingcosana bazwakale belibeka ngesihloko elokuthi unondweba uyabalekelela. Leli phephandaba lizizwele kwabona bethi akuwona amaphenathi lawa anikwe ikilabhu yabo.
UJomo Biyela ongumnikazi weBay ekhuluma naleli phephandaba akafunanga ukwanda ngamaningi wathi: “Angifuni ukuphawula kakhulu ngalento kodwa ngingasho ukuthi iligi kuzofanele iyibuke lento kungaze kwenzeke umonakalo.
“Kuzofanele isheshe ngoba kuningi okwenzekayo okungekuhle,” kusho uBiyela.
UMoma Medic ololonga i-Eagles akafunanga ukuphawula ngonondweba wathi yena into emjabulisile wukuthi ezakhe zithole amaphuzu amathathu amqoka.