Uhulumeni mawusiyeke siziphehlele ugesi
SEKUCACE bha kuhle kwekati elimhlophe ehlungwini manje ukuthi abaphathi benkampani yombuso ephehla amandla kagesi i-Eskom - nohulumeni imbala - behlulekile wukuphatha le nkampani kahle ukuze ikwazi ukwenza umsebenzi eyakhelwa wona wuhulumeni wobandlululo.
I-Eskom imemezele kuleli sonto ukuthi ezinye izikhungo zayo zifile, ezinye kazikwazi ukuphehla ugesi ngokusezingeni elilindelekile, ngakho amakhasimende ale nkampani kuzokwenzeka angabi nawo ugesi amahora ayisithupha kuya kwayisishiyagalombili ngosuku. Lesi simemezelo sishaqise abaningi, saqeda ithemba ezakhamizini, lokuthi abaphathi nohulumeni imbala, bayayazi into abayenzayo.
Kubalulelile ukuba sikhumbuzane ukuthi ukunqanyulwa kukagesi izikhawu ( load-shedding), kwaqala ngo2008, kusaphethe uhulumeni kaMengameli Thabo Mbeki. Ngaleso sikhathi izwe lathenjiswa ukuthi isimo sizobuyela kwesijwayelekile ngo-2014-15, nxa sekuphothulwe ukwakhiwa kweziteshi ezintsha zokuphehla amandla kagesi, iKusile neMedupi. Sekuwumlando manje ukuthi lokhu kakwenzekanga; zombili lezi ziteshi kazikapheli ukwakhiwa kanti sezidle imali ephindaphindwe cishe kathathu kunaleyo eyabe ikwibhajethi yokwakhiwa kwazo.
Sekutholakele futhi ukuthi kazakhiwanga ngendlela esezingeni elifanele ngenxa yokuthi kwakushaywa ngezimfushane, kwebiwa imali yokuzakha ukuze kuhlafune abathile abasondelene neqembu elibusayo.
Okuyishwa elikhulu ngokunqanyulwa kwamandla kagesi, wukuthi kunomthelela omkhulu ebuthakeni bomnotho wezwe, ngoba kuphazamisa imikhiqizo yezinkampani. Kuleli sonto nje, izimayini eziningi ezweni zimise ukusebenza ebusuku ( night shift) ngoba zesaba ukuthi ukungabikhona kukagesi kungaba yingozi nxa kwenzeka ingozi kunezisebenzi ezisemathunjini omhlaba. Sekube nemizamo yezinkampani ezithile yokuzakhela iziteshi zazo zokuphehla amandla kagesi ngoba sezikhathele yizithembiso ezingagcinwa ze-Eskom.
Inkinga wukuthi uhulumeni uyenqaba ukuzinika izimvume zokwenza lokhu ngoba uvikela i-Eskom, ofuna kube yiyona nkampani kuphela enelungelo lokudayisa ugesi ezweni. Lokhu kuyaxaka ngoba le nkampani - okumanje inezikweletu ezibalwa ku-R500 billion - kayikho esimeni sokwenza umsebenzi wayo, okuyinto esiyibonakalise iminyaka ewu-11 edlule.
Kufanele ngabe sekucacele bonke abantu abanezindlebe, abakwazi ukuzicabangela ukuthi le nkampani nohulumeni oyengamele, bayizehluleki futhi ngeke nanini bakwazi ukuxazulula le ngwadla izwe elibhekene nayo. Kubonakala sengathi maduze nathi sizofana nawo wonke amanye amazwe ase-Afrika, lapho ukutholakala kwamandla kagesi okungenamkhawulo, kuyinto ayizwa ngendaba. E-Nigeria nje, esinomnotho omkhulu ngisho kunowethu, abantu abanamandla sebakhohlwa yizethembiso zohulumeni bakhona, bazithengela ama- generator ukuze iqhubeke impilo.
Nathi sekuseduze sifike kuleso simo. Uhulumeni kufanele udedele imiphakathi, amadolobha nezinkampani abangakwazi ukuzakhela iziteshi zabo ukuba bakwenze lokhu ukuze iqhubeke impilo. Phela manje sekucacile ukuthi wona (uhulumeni) usuhluleke wancama ukwenza umsebenzi wawo.