Sifane noKhisimusi kuhulumeni ese-data
I-COMPETITION Commission, okuwuphiko lukahulumeni olubheke ngawokhozi ukuthi izinkampani ezihweba eNingizimu Afrika, zincintisana ngendlela efanele, enganyusi intengo, selunike uhulumeni isipho sikaKhisimusi.
Lolu phiko lukwenze lokhu ngokumemezela ukuthi izinkampani zakuleli zomakhalekhukhwini kumele zehlise intengo ye- data ngenani eliphakathi kuka-30% no-50%.
Lunqumele iVodacom neMTN ugwayi katiki, lwathi uma lezi zikhondlakhondla zezinkampani zingayehlisi intengo ye- data, luzothatha izinyathelo zomthetho, lufake icala kwiCompetition Tribunal.
Le khomishini iphinde yaphakamisa ukuba zonke izinkampani zomakhalekhukhwini kumele zibe nenani le- data yamahhala ezilinika abathenga i- data kuqala ngaphambi kokuba bayisebenzise ( pre-paid). Lokhu, ngokwekhomishini, kuyokwenza ukuba kungabikhona sakhamuzi sakuleli esingenalo inani elithile le- data.
I-Commission iphinde yathi kumele kucace ukuncintisana kwezinkampani zomakhalekhukhwini. Lokhu kuzokwenzeka ngokuthi izinkampani ezinkulu zomakhalekhukhwini zibe namabhuku amabili emali, ukuze kucace ukuthi zingakanani izindleko zokuhweba ezikhokhwa yinkampani ngayinye futhi ingakanani inzuzo inkampani ngayinye eyenzayo.
Lezi zinqumo zale khomishini zilandela uphenyo olwenziwe mayelana nokusebenza kwezinkampani zomakhalekhukhwini, ikakhulukazi ukuthi kungani intengo ye- data kuleli ibize kangaka.
Lolu phenyo nesinqumo seCompetition Commission kuqhamuka nje, sekuneminyaka abantu abasebenzisa omakhalekhukhwini neminye imishini esebenza nge- data bekhala ngokuthi iyabiza (i- data). Lesi sikhalo sesaze safinyelela nasephalamende imbala.
Uhulumeni ne-Independent Communications Authority of South Africa (Icasa), sebehlulekile wukuthatha izinyathelo ezifanele ukuze kwehle intengo yedata. Uhulumeni ubulokhu uthembisa ukuthi intengo ye- data izokwehla uma sekwenziwe izinguquko mayelana nokusebenza kwemboni yezokuxhumana ( telecommunications). Sekuneminyaka eminingi uhulumeni ulokhu uthembisa ukuthi uzonikeza izinkampani zomakhalekhukhwini i- spectrum entsha, okuyiwayilense esemkhathini esetshenziswa yizinkampani zomakhalekhukhwini ukuhambisa amazwi abantu abashayelana izingcingo ngomakhalekhukhwini noma ukuthumelana imibiko besebenzisa i- data.
Lezi zethembiso seziphenduke ihlaya ngenxa yokuthi uhulumeni uzenza unyaka nonyaka, kodwa zingafezeki. Izinkampani zomakhalekhukhwini zikhala ngokuthi ukungabi nayo i- spectrum eyanele kwenza umsebenzi wazo ube nzima, ngakho-ke zithi akuzona ezidala ukuba intengo ye- data imbe eqolo. Isinqumo seCompetition Commission sizotakula uhulumeni kule nyakanyaka, ikakhulukazi uma ikhomishini iphumelela ukuphoqa lezi zinkampani ukuba zehlise intengo ye- data. Nokho lezi zinkampani ziyavungama ngalesi sinqumo.
Akukacaci nokho ukuthi zizothatha ziphi izinyathelo.
Zimbili izindlela; eyokuqala lezi zinkampani zingahlala zilinde ukuthi ikhomishini ifake icala, bese ziyaziphendulela phambi kweCompetition Tribunal.
Eyesibili; lezi zinkampani zingaqonda ngqo enkantolo enkulu ziyocela ukuba imise ikhomishini ingaqhubeki nalolu daba. Zombili lezi zindlela zizobeka izinkampani zomakhalekhukhwini engcupheni ngenxa yolaka lwabantu asebeneminyaka bekhala ngentengo ephezulu ye- data.
Indlela izakhamizi zakuleli eziphoqe ngayo izinkampani zemishwalense ukuba ziguqule izinqumo zazo zokungakhokheli amapholisi, ziyisibonelo sokuthi ukuhlangana kwazo zilwela amalungelo azo, kungaba nomthelela omuhle ekugcineni.
Kulindeleke ukuba uhulumeni ungenelele ngasohlangothini lwekhomishini, okuyisinyathelo esingabeka amathuba eVodacom neMTN okuhwebelana nohulumeni nezinkampani zawo engcupheni.
Le ngcuphe ingadaleka ikakhulu uma lezi zinkampani zisoleka ngokuzama ukuphoqa ikhomishini ukuhoxisa isinqumo sayo.
Ukwehliswa kwentengo ye- data kuleli kungaba nomthelela omuhle kakhulu kwezomnotho, njengoba ukwehliswa kwezindleko zokuxhumana kuleli kungenye yezinhloso zikahulumeni okufukula umnotho wakuleli. Izakhamizi zakuleli zingahlomula kakhulu ngokwehla kwezindleko zokuxhumana.
Omakhalekhukhwini sebande kakhulu kuleli, usuthola isalukazi sihleli phakathi kuguqasithandaze, sisebenzisa umakhalekhukhwini.
Ukwehliswa kwezindleko zokuxhumana ngomakhalekhukhwini kungahlomulisa kakhulu abampofu, njengoba kuyibo abathenga i- data ngaphambi kokuba bayisebenzise, futhi abampofu kabanawo amanye amathuba, njengawokusebenzisa iWi-fi, okuyinto esiyandile kakhulu ezindaweni ezihlala abadla izambane likapondo.
Ngokombiko woMnyango wezeMali, ukuphuculwa kwezimboni ezifana nezokuthutha nezokuxhumana, kungenyusa izinga lokukhula komnotho waseNingizimu Afrika kubeke naleli ezingeni elingcono lokuncintisana namanye amazwe. Izimboni ezifana nezezokuthutha nokuxhumana ziwumgogodla womnotho wezwe.
Akugcini nje lapho kuphela, lezi zimboni ziphinde zibe neqhaza elikhulu ekufezeni izidingo zansuku zonke zomphakathi, njengokuxhumana ngomakhalekhukhwini.
Lezi zimboni zibuye zidale namathuba emisebenzi, yingakho nje uhulumeni kuzofanele usamukele ngezandla zombili isipho sikaKhisimusi esivela kwiCompetition Commission.
Phezu kwalokhu, uhulumeni kumele usebenzise leli thuba uhlale phezu komsebenzi wokuphuculula imboni yezokuxhumana.