KUHOXE OMASIPALA ABAKHULU KUMA-SALGA

IZODLALWA ngomasipala abangaphelele imidlalo yamaSalga Department of Sports (DSR) Games eqala namuhla ngoLwesine eThekwini.

ILANGA lithole ngomthombo walo ongashayi eceleni ukuthi iLembe, uThukela noGu ngeke babe yingxenye yale midlalo nonyaka.

Omasipala abazobamba iqhaza yiTheku, uMgungundlovu, uMzinyathi, uMkhanyakude, iZululand, iHarry Gwala, AmaJuba neKing Cetshwayo. Yize izokube ikhona iKing Cetshwayo kodwa omasipala bayo ababili okuwuMthonjaneni neNkandla kuthiwa bahoxile ekubambeni iqhaza.

“Sithole izincwadi eziphuma kwiLembe, uThukela noGu besazisa ukuthi ngeke bakwazi ukubamba iqhaza kulo mqhudelwano. Bonke bakhale ngokuthi kabanayo imali eyanele,” kusho umthombo.

ILANGA lithole ukuthi kumba eqolo ukulungiselela lo mqhudelwano. Kuthiwa umasipala kufanele uthengele abadlali bawo imifaniswano.

Kuthiwa omunye usebenzise imali engaphezulu kuka-R700 000 ukuthenga imifaniswano kanti kufanele uhlelele abadlali izindawo zokulala okuhlanganisa izimeya namakhansela.

Imidlalo yokuvula izokuba namuhla ngoLwesine eNorth Beach, eThekwini, kanti kuzokube kuqhudelwana kwezokugijima, i- basketball, isibhakela, i- chess, ikhilikithi, umdanso, unobhutshuzwayo, igalofu, imidlalo yesintu, umkhalambazo, ibhola lomnqakiswano, elombhoxo, ezokubhukuda, i- table tennis, ithenisi ne- volleyball.

Le midlalo izodlalelwa eKings Park Athletics Stadium, eHoward College (Gate 10), ePrincess Magogo Stadium (KwaMashu), eKing Zwelithini Stadium (eMlazi), ePeople Park, eHoy Park, eWindsor Park, eKings Park Swimming Pool, eChatsworth Youth Centre, e-Old Mutual Sport Centre, uMlazi Indoor, eWestridge, eCato Manor naseDUT.

AbamaSalga bakuqinisekisile ukuthi uGu, uThukela neLembe ngeke babe yingxenye yale midlalo nonyaka. Bathi labo masipala bathe banezinkinga nonyaka kodwa bazokuba yingxenye yawo ngonyaka ozayo.