Kubuya owokupinisa izimoto eMtshezi
Kubhekwe izinga eliphezulu kwiSomgubha yanonyaka
KUZOHLONISHWA iqhawe lokupiniswa kwezimoto laseHowick elisanda kushona emqhudelwaneni iSomgubha Festive Spin Bash ohlelelwe uMsombuluko weholidi kusuka ngo-12 emini eLambert Park yodumo eMtshezi.
USphamandla “Somgubha” Vilakazi ongumsunguli walo mqhudelwano ogubha iminyaka ewu-5 nonyaka, utshele ILANGA ukuthi kule midlalo bazokuba nesikhathi esikhethekile abazongena ngaso bezoshaya izidudla ukuhlonipha uNqavi obengumnikazi wezimoto, iSkhwama Drifters, odlule kulo nyaka emhlabeni.
Uthi yingakho bethathe isinqumo sokusebenzisa kakhulu izimoto eziqhamuka KwaZulu-Natal nonyaka, okungabantu abazi kahle amagalelo kaNqavi, ukuze benze ubulungiswa ngokupinisa izimoto ngendlela ezoshiya abalandeli bebheme bakholwa uma sekuyisikhathi sokumhlonipha.
Nokho zikhona nezimoto ezizokube ziqhamuka eGauteng kanti umshayeli obhekwe kakhulu ngabomvu kuzona nguColey “Moruti” Golden odlisa ngokudlubha izevatho zaseZion Christian Church (ZCC) uma esegila izimanga ngemoto.
Amathikithi okubuka lo mqhudelwano azotholakala esangweni ngosuku lomcimbi ngo-R100 awabadala no-R50 awezingane ezineminyaka engaphansi kwewu-12 ubudala.
Ama-cooler box avumelekile yize zingafuneki iziphuzo ezisemabhodleleni kwazise abuye aphenduke izikhali eziyingozi.
USomgubha ugcizelele eyokuthi ezokuphepha zizokube ziqine kakhulu ukuqinisekisa ukuthi abathandi balo mdlalo bawuthokozela ngaphandle kokuphazamiseka njengaseminyakeni edlule kwazise kazikaze zibe khona izigameko ezimbi yize kuhlale kubuthene abezinhlanga ezahlukene kulo mqhudelwano.