Kubhekwe isinqumo seSafa ngeyeMotsepe
Iqashe umlolongi omusha iNatal United
SIBHEKWE ngabomvu isinqumo seSafa ngesifundazwe esizosingatha imidlalo yamakilabhu azokuba yizingqwele zezifundazwe ze-ABC Motsepe League yokuhlungela ukunyukela kwiGladAfrica Championship.
ILANGA lithole ukuthi izifundazwe ezihamba phambili ngokufuna le midlalo yiNorth West, iGauteng neLimpopo.
Nokho kuthiwa umnyango usavuliwe nakwezinye. Lezi zindaba ziqinisekiswe nguKwenzakwakhe Ngwenya ongusihlalo wemiqhudelwano yeSafa esifundazweni.
Uqhube ngokuthi eminyakeni ezayo le midlalo ngeke isayiswa ezifundazweni ngokubheka ukuthi sigudle ulwandle yini kumbe simaphakathi nezwe, kodwa sekusebenza ukuthi yisiphi esifake isicelo esiconsisa amathe ukusingatha le midlalo.
Le midlalo ingemikhulu kwehlelwa yiSafa njengoba ithatha isonto lonke futhi eyokusonga isakazwa bukhoma kumabonakude.
Uqhube ngokuveza ukuthi kabayihlehlisanga imidlalo yeSafa KZN ABC Motsepe League yanonyaka kwazise kayikho ikilabhu efake isicelo sokuba imidlalo yayo imiswe okwesikhashana. Uthi imidlalo bayihlehlisa kuphela uma kunekilabhu okusuke kuthathwe abadlali bayo abangaphezulu kwabathathu.
Iqashe umqeqeshi omusha uGabriel Morewa iNatal United ezama ukubalekela ukugencwa yizembe kwiSafa KZN ABC Motsepe League ekupheleni kwesizini.
Uthathe indawo kaBonginkosi “Kai-Kai” Mhlungu osule ngoLwesibili kulo msebenzi. Izindaba zokuqashwa kukaGabriel ziqinisekiswe nguBongani Caluza ongumnikazi wale kilabhu.
UMvoti FC uzokwamukela iSummerfield Dynamos emdlalweni okubhekwe ukuba ushube ngoMgqibelo ngo-15h00 eKing Edward, eGreytown.
Womabili la makilabhu acijwa ngabaqeqeshi asebeke baya emidlalweni yokuhlunga. UMvoti FC ugabe ngoDoctor Mkhonza kanti iDynamos iphekwa nguRonnie Gabriel owanyusela kwiNFD uThongathi FC.
Isiyonke imidlalo yeSafa KZN ABC Motsepe League yokuvala unyaka ihlelwe kanje:KUSASA NGOLWESIHLANU KwaMsane: Natal Rich Boys vs Rainham Sporting 13h00. NGOMGQIBELO EWadley Stadium: Movers FC vs Zululand Warriors 13h00.
ESouth Coast Academy: Happy Wanderers vs Edendale Juventus 15h00.
EMhlathuze Sports Complex: Milford FC vs Durban 15h00.
ENgcedomhlophe Stadium: Muzi King Masters vs XI Experience 15h00.
EKing Edward Park: UMvoti FC vs Summerfield Dynamos 15h00. NGESONTO E-KK: KwaDabeka Sporting vs GWP Friends 15h00.
EHoward College: Natal United FC vs Qwabe United 15h00.