Kunxenxwa abalandeli ukucindezela iDowns
UHULUMENI waKwaZulu-Natal uhlaba ikhwelo kubantu bakulesi sifundazwe ukuba bacindezele iMamelodi Sundowns ukuze kunqobe ikilabhu yasesifundazweni, iMaritzburg United.
IMaritzburg izodudulana neSundowns kowamanqamu weTelkom Knockout ngoMgqibelo ngo-18h00 eMoses Mabhida Stadium, eThekwini.
UNdunankulu waKwaZuluNatal uSihle Zikalala nongqongqoshe wezemidlalo esifundazweni uHlengiwe Mavimbela, bacela abantu bakulesi sifundazwe ukuba baphume ngobuningi babo ukuyogcwalisa iMoses Mabhida bese bekuqinisekisa ukuthi beseka iMaritzburg hhayi iSundowns.
UZikalala uthe: “Isifundazwe iKwaZulu-Natal siyaziqhenya ngokusingatha lo mdlalo omkhulu kangaka. Okwenza siziqhenye nakakhulu wukuthi ikilabhu yethu, iMaritzburg United iyingxenye yalo mdlalo.
"Siyayithanda iSundowns, iphakamise izwe lethu inqoba umqhudelwano wase-Afrika (iCaf Champions League).
"Nokho ngoMgqibelo sizobe si-ngahambi nayo, sizobe seseka iki-labhu yasekhaya.
“Sicela bonke abantu baKwaZuluNatal namaphethelo, ikakhulukazi abaseMgungundlovu naseThekwini, ukuba baphume ngobuningi babo ukuzogcwalisa iMoses Mabhida bese beseka iMaritzburg.
"Sicela abantu bakulesi sifundazwe bakhombise ukuyeseka le kilabhu ngokuthi ngelanga lalo mdlalo bagqoke imifaniswano yayo, inkundla ipendwe nje yonke ngemibala yeMaritzburg,” kusho uZikalala.
UMavimbela uthi bazokwenza ngawo wonke amandla ukusiza iMaritzburg kulo mdlalo.
“Okwenziwe yiMaritzburg kuhle ekuthuthukiseni ezemidlalo nesifundazwe nje sonkana.
"Abadlali abaningi abasebancane bayakhuthazeka ngokwenziwe yile kilabhu.
"Njengoba sihlale senza nakwamanye amakilabhu enza kahle, nathi-ke siwumnyango sizoyisiza ngezokuthutha ukuze ilayishe abalandeli bayo ukuya emdlalweni,” kusho uMavimbela.
Lo mnyango kuvela ukuthi uxhase le kilabhu ngamabhasi awu-20.
Indebe yeTelkom kayikaze inqotshwe yikilabhu yaKwaZulu-Natal kanti iSundowns igcine ukuyiqukula ngo-2015 ihlula iKaizer Chiefs ngo-3-1 eThekwini.