Kuphazamisekile ukufunda ezikoleni eziningi eMpendle
Othisha nabafundi baze bagoduka kungahambeki
KUPHAZAMISEKE ukufunda nokufundisa ezikoleni ezingaphezulu kweziwu-10 eMpendle njengoba bekuvulwa izikole izolo ngoLwesithathu ngenxa yomphakathi wakule ndawo obuvutha ungabaselwe, ovale umgwaqo omkhulu ongenela ezindaweni ezintathu zakule ndawo.
Lo mgwaqo ungenela eNguga, iNzinga neStoffelton ukhala ngokugqoza kwentuthuko kule ndawo. Othisha nabafundi bame zaze zabuya inhlazane, kwaphoqeleka ukuba bagoduke.
Ekhuluma neLANGA uMnu Londa Ndingi, osekomidini lewadi, ku- ward 2, uthe umphakathi unqume ukuvala umgwaqo emuva kwesikhathi eside ukhuluma neziphathimandla, kodwa kungekho okuqhubekayo.
“Okwenza abantu bagcine sebeya emgwaqweni, indaba yomgwaqo u-L743 ongenela eMzumbu, osekuphele iminyaka ucela ukuba ulungiswe kodwa lutho.
"Ukungalungiswa kwalo mgwaqo sekwenza ukuba amatekisi angabangenisi futhi angabalandi abantu ezitobhini zabo, bagcine sebeba wukudla kwezigebengu.
"Izingane zesikole ezithathwa ngomalume nazo zibhekene nengwadla - njengoba izimoto ezizithuthayo zingasakwazi ukungena ngenxa yobubi balo mgwaqo. Kunenkundla yezemidlalo eyakhiwa ngo-R6 million kodwa namanje engakaqedwa ukwakhiwa ekubeni sasitshelwe ukuthi izoqeda ukwakhiwa emuva kwezinyanga eziwu-6.
"Izingane zigcwala emigwaqeni, akukho lapho zidlala khona ngoKhisimusi. Kule ndawo bekuba neziteki, kuqhudelwane ngebhola kodwa manje okungasenzeki njengoba inkundla ingasekho. Kule ndawo obekunenkundla kuyona, kwakhiwe ihholo esizwa kuthiwa nalo selihlephuka o- ceiling board kodwa singakanikezwa lona ukuba silisebenzise siwumphakathi,” kusho uMnu Ndingi.
UMnu Sadewu Ngubane, oyikhansela le-IFP kule ndawo, uthi yize kubuhlungu ukuba kugcine kuphazamiseka abafundi kodwa lezi zikhalo ezishiwo umphakathi kade baqala ukukhala ngazo.
“Kunebhuloho nje eliseNzinga elakhelwe zona izingane zesikole ukuba ziwele kalula ngoba umfula iNzinga uyagcwala uma linile, elaqala ukwakhiwa ngo-2017 nanamhlanje lisakhiwa, kalipheli.
"Siyacela amakhansela asebenzisane nomphakathi ngoba ukuba ikhansela beliwazisa umphakathi ngokuqhubekayo, mhlawumbe lesi simo besizolawuleka. Siyacela nomphakathi wehlise imimoya ngoba sekumosheka nemfundo yabantwana bethu,” kusho uMnu Ngubane.
UMnu Kwazi Mthethwa, okhulumela uMnyango wezeMfundo KwaZulu-Natal, uthi isenzo sababhikishi kasemukeleki.
“Lolu daba bese sizwile ngalo, sisabhala umbiko ogcwele ngalo,” kusho uMnu Mthethwa.
IMeya yaseMpendle, uMnu Sizwe Ndlela, ucingo lwayo belungangeni izolo kanti nasemahhovisi kamasipala izingcingo bezingabanjwa.