USUTHU EMPINI YOKUQEDA IREKHODI ELIBI
AMAZULU FC awuthatha njengowamanqamu umdlalo wawo neMaritzburg United we-Absa Premiership ozokuba kusasa ngoLwesihlanu ngo-20h00 eHarry Gwala Stadium, eMgungundlovu, kwazise alwela ukusuka ngokushesha emngceleni wezembe.
USinethemba Sithebe oyinjini yoSuthu utshele ILANGA ukuthi kabafuni ukuficwa ngamathonsi abanzi, yingakho bezimisele ngokuqoqa amaphuzu agcwele kusakhanya, bengakabi ngaphansi kwengcindezi enkulu.
Uthi bazimisele ngokuqeda irekhodi labo elibi lokuhluleka ukuguqisela iTeam of Choice esibayeni sayo.
“Umqeqeshi wethu usidonse ngendlebe ukuba siyifake ngaphansi kwengcindezi zisuka nje amadaka iMaritzburg. Sizoqikelela ukuthi sidlala ngendlela ehlelekile kusuka emuva kuya phambili ukunqoba lo mdlalo.
"Siyazi ukuthi ngeke kube lula kwazise abalandeli bayo bafika ngobuningi ukuzoyeseka nxa isekhaya.
“Emdlalweni wethu odlule sibhekene nabo eMgungundlovu sacindezelwa kakhulu ngabalandeli babo. Yingakho-ke kumqoka ukuba siqine nangokwemiqondo ukuze sikwazi ukubuya nomphumela omuhle,” kusho uSithebe.
Lo mdlali uqinise abalandeli boSuthu idolo ngokuthi kuzophela isizini sebephefumula ngokukhululeka, kwazise bazokube sebeqhelelene kakhulu nezembe. Unxuse abalandeli boSuthu ukungquzuka kuzona zonke izinkalo bazobeseka kulo mdlalo othathwa njengowezinkani zababili.
UBrilliant Mkhathini oyisikhulu sezokuxhumana oSuthwini, uthe okuhle wukuthi bazokuya kulo mdlalo nesikwati esiphelele njengoba engekho umdlali omisiwe.
Uthe nguSiyabonga “Nqaba” Mbatha ongunozinti kuphela abasalindele uvo lodokotela ukuthi sebengamsebenzisa yini njengoba ebuya ekulimaleni.