Ukuhanjiswa kwezibizo
AKUBI nsukuzatshwala enikiwe umkhongi isijingi sakhe bese ephindela futhi emzini esehambise izibizo zomame. Umkhongi uphelezelwa ngumakoti wakwamkhwenyana nentombi.
Laba ababili bathwele iminqwazo nezembatho, umkhongi yena aqhube imbuzi. Bazonele bafike emzini, umkhongi ame ngenhla kwesibaya nentondolo, besekuthi abafana balapha ekhweni bamemuke yona bayibophe esibayeni ngomchilo.
Usezongena elawini nalaba abamphelezelayo. Bazothi bangaphelela omame, bese ebabela izibizo lezo babonge kuphele, bese ecela umchilo wakhe sekuyavaleliswa njalo.
UKUBONWA KWEZINKOMO
Umkhongi manje usephuthuma ukuwuqeda umsebenzi wakhe, akasenasinqe mpelampela. Uthi eqeda ukubika ekhaya abe ephindela emzini futhi. Manje useyocela izwi lokucwila.
Umukhwe uzokwala nalo athi ufuna ukubona izinkomo zakhe kuqala. Usezoyobika emuva umkhongi besekulungiswa utshwala bokubonwa kwezinkomo.
Usezoya ekhweni futhi umkhongi eseyobanqumela ilanga abangafika ngalo phela. Izinkomo zibonwa ekuseni. Umukhwe lona uphelekezelwa ngabafowabo.
Unele angene ngesango azwakale amakhosikazi esekikizela. Usezobemukela umkhongi ngoba phela nguyena owengamele lo msebenzi.
Usezobangenisa kulo ilawu lapho umakoti agoba khona uthingo. Sebengena belu abalingani ukuzobingelela. Intsha yona kayibabingeleli abakhwe, iyabahlo-nipha. Sekuthunyelwa abafana ukuba ba-qoqe izinkomo nezimbuzi.
Bayaphuza belu abalingani laphaya elawini. Umfana usezobika ukuthi impahla isibuyile, baphume-ke abalingani sebeya esibayeni.
Sezizokhishwa zonke ezakulo muzi kusale amabheka kuphela. Usezokhulumake uyise womyeni athi, “nakho-ke nami mlingani engakuyenga ngakho‚” sebezobonga bangcongcoze abasekhweni besebebuyela endlini.
Bazothi bengena bebelandelwa ngenkulu intondolo iqhutshwa ngumfana elandelwa nguyise nomkhongi. Usezobuyela futhi umnumzane kumlingani wakhe athi yiyona ndlakudla yakhe. Babonge futhi abasekhweni. Sebezoyinikela kumkhongi ukuba ibulawe iphekwe.
UKUDLIWA KWENDLAKUDLA YABAKHWE
Ukudliwa kwezindlakudla zonke kuyefana. Yileyo naleyo inomgomo ofanayo wokusetshenzwa kwenyongo nokosiwa kwezibindi. Inomgomo ofanayo wokwabiwa kwenyama nokudliwa kwayo.
Okwakwejwayelekile nokho, wukuthi isifuba singaphekwa njengoba kushiwo phambilini, kepha sisongwe ngesikhumba sithwalwe yilowo onikwe indlakudla aze aphathele abasekhaya.
Sasiboshwa ngotshani obenziwe uhlaka, kuthi uboya besikhumba buvele ngaphandle ukukhombisa umbala wembuzi leyo okwenziwe ngayo isijingi. Emuva kokubusa nangotshwala basekhweni, sebezovalelisa bahambe. Umkhongi uzobakhapha ibangana bese ebuya.
Nguyena phela umkhongi othatha indawo yomkhwenyana, kwazise yena (umkhwenyana) akaveli kumukhwe wakhe, uze anikwe indlakudla. Akusho ukuthi kufanele ambalekele kodwa uyamhlonipha.
Ngeke bahlala ndlininye ngaphandle kokuba umkhwenyana angene ngokuyobingelela bese ephuza kanye aphume. Ngokuzayo sizophawula ngendlakudla yomkhwenyana.