KUCHIBIYELWA OWOKUSHADISA
SEWEMUKELWE umthethosivivinywa wokuchibiyela umthetho wemishado, iCivil Union Amendment Bill, njengoba izolo ngoLwesithathu uvunyiwe yiNational Council of Provinces (NCOP), osekusele manje wukuba usayinwe nguMengameli Cyril Ramaphosa ukuze usebenze.
Umphumela walokhu kuzoba wukususwa kweSigaba 6 somthetho wemishado esinephuzu elivumela ukunqaba ukushadisa abathile ngesizathu sikanembeza.
Lokhu kuphoqa izimantshi neziphathimandla zikahulumeni ezishadisayo ukuba zifungise imishado yabantu bobulili obubodwa - okungase kushayisane nonembeza bazo, yinkolo nenkolelo yazo - okanye zizitholele omunye umsebenzi.
Inhlangano elwela inkululeko yezenkolo, iFOR SA, ikhiphe isitatimende ithi:
“Kumqoka ukusho ukuthi iSigaba 6 safakwa emthethweni wemishado, iCivil Union Act ngenxa yesinqumo seNkantolo yoMthethosisekelo odabeni lukaFourie esaba yingqophamlando ngokuvumela imishado yabantu bobulili obubodwa eNingizimu Afrika.
Lapha iJaji Albie Sachs lakucacisa kahle ukuthi umgomo wokwamukelana okunomqondo ophusile, ungakuqinisekisa ngokuthi iziphathimandla ezinqaba ngonembeza oqotho ukushadisa ngenxa yezizathu zenkolo, zingaphoqwa ukushadisa nxa umphumela walokhu uphambana nonembeza bazo”.
Izinhlangano ezahlukene, okubalwa nayo iFOR SA, zazenza izethulo lapho zabeka khona ezinye izindlela ezingaba yikhambi ezinkingeni ezahlonzwa, ezingeke zidale ukuba kube khona onyathela unembeza womunye.
Kulesi sitatimende i-FOR SA iveza ukuthi okwashiwo nguJaji Sachs kwashaywa indiva ngamabomu.
UmQondisi we-FOR SA, uMnu Michael Swain, uthe kuyishwa ukuba esikhundleni sokufuna ikhambi eliphumelelisa bonke abantu futhi elinokucophelela ukuthi wonke amalungelo avumela ukwahlukana ngokwemibono nenkolelo, iPhalamende laseNingizimu Afrika likhethe umphumela ovuna uhlangothi olulodwa.