KUTHUNGATHWA OLAHLE INGANE
KUTHUNGATHWA owesifazane osolwa ngokulahla ingane esanda kuzalwa eSt Lucia, eMtubatuba ngoMsombuluko. Kubikwa ukuthi le ngane itholwe ngumuntu obezihambela, oyizwe ikhala eduzane naseposini lendawo.
Umthombo weLANGA ulitshele ukuthi le ngane itholwa nje, beyifakwe kuplasitiki kadoti, yalaxazwa eduze kwaseposini.
“Umlungu obehamba ngemoto ubone lo plasitiki obusolisa kanti bekuzwakala iphimbo lengane ekhalayo. Ube esebiza onogada abasebenza eduze nale ndawo, okuthe uma kuvulwa lo plastiki kwatholakala le ngane isongwe ngebhayi," kusho umthombo.
Kuthiwa abayitholile bayiphuthumise emtholampilo, yadluliselwa esibhedlela saKwaHlabisa ukuze izobhekwa ngodokotela.
Okhulumela amaphoyisa KwaZulu-Natal, uCapt Nqobile Gwala, usiqinisekisile lesi sigameko wathi kusaphenywa.
Kucelwa noma ngubani ongaba nolwazi ngonina axhumane namaphoyisa aseMtubatuba noma ashayele inombolo yamahhala ethi 08600 10111.