BAKHANKASELA UMTOLO KWESOKUHOLA I-KZNA
USIHLALO weHammarsdale Athletics Club uRichard Bhengu uphakamisa igama likaWillie Mtolo ukuhola iKwaZulu-Natal Athletics (KZNA) njengoba kuwunyaka wokhetho.
Kuzokhumbuleka ukuthi usuku lokhetho ngabe selumenyezelwe kodwa kwaphazamisa iCovid-19 ehlasele umhlaba wonke okwenze kwama yonke into.
UBhengu ufonele ILANGA encoma umbiko kaMtolo ophume ngeledlule, kukhulunywa ngempilo yakhe. Kulo mbiko uMtolo wakubeka kwacaca ukuthi angakujabulela ukuba kwibhodi yeKZNA.
Ikilabhu eholwa nguBhengu inomjaho wayo iMathews Meyiwa Half Marathon eba minyaka yonke kule ndawo. Kumanje iKZNA iphethwe nguMlawuli ozimele uRay Reddy ebambisene neTask Team kulandela ukumiswa kwayo yonke ibhodi yale nhlangano.
“Sekuyisikhathi sokuba iKZNA iholwe ngumuntu onomlando kwezokugijima. Njengosihlalo weHammarsdale ngiphakamisa igama likaMtolo. Sonke siyawazi amagalelo akhe. Sengike ngakhuluma naye, uthe angakujabulela ukuhola iKZNA. UMtolo ugijime imijaho eminingi kuleli naphesheya kwezilwandle. Ukuholwa ngumuntu ofana naye ngicabanga ukuthi kungaletha omkhulu umehluko kwezokugijima eNingizimu Afrika yonkana.
“Isikhathi esiningi sifakelwa abantu abangagijimanga, abangabazi ubuhlungu bokugijima. Sekuyisikhathi manje sokuba silethe abantu abawuqonda kahle lo mdlalo. Sizohlangana naye kuleli sonto ukubhunga ngalolu daba, ngimazise ukuthi sidingani kuyena.
“Nginesifiso sokuba basebenzisane noMlungisi Wosiyana osanda kushiya kwiTask Team. Yibona abazokhetha ukuthi ngubani ofuna ukuba ngumengameli nesekela. Umbiko obhalwe yiLANGA yiwona ongenze ngafikelwa wumbono wokuba siphakamise uMtolo kulolu khetho esizokuba nalo,” kusho uBhengu.
Leli phephandaba lixhumana noMtolo, uvumile ukuthi useke wathintwa, wacelwa ukuba ahole iKZNA. Uthi ithuba elifana naleli ulamukela ngezandla zombili. Uthi into yokuqala angayenza wukuhlangana nabagijimi kudwetshwe uhlelo oluya phambili.
UWosiyana uthe: “Okubalulekile wukuba sikhethe abantu esibethembayo ukuhola ezokugijima. Kufanele kube ngabantu abagijimile futhi abanekhono lokuhola, baphinde babe nombono ocacile ngekusasa leKZNA. Kangiyithandi le nto yokuba kukhishwe umuntu ngoba engasafunwa njengoba kwenzeke kuSello Mokoena no-Aleck S'khosana ngokwahlukana.
“Amakilabhu kufanele avumelane ngomuntu amfunayo ukuze angabi nankinga ngokuhamba kwesikhathi. Kumele kuqashelwe ukuthi umuntu ophawula kakhulu emhlanganweni kakusho ukuthi uyakwazi ukuphatha. Akhona amakilabhu aseke angithinta mayelana nokuphathwa kweKZNA.”
Amanye amagama okuthiwa ayavela okhethweni lweKZNA ngelikaSolwazi Logan Naidoo, uSteve Mkasi, uMzomusa Gumede ukubala nje abambalwa. Kuthiwa bakhona abanye asebeqalile ukuhlanganisa amakilabhu ukuba abavotele uma sekufika lolu suku.