URHULANI MOKWENA UPHEFUMULA NGOKUSHIYA I-CHIPPA UNITED
USALINDE imiphumela yobufakazi bokuthi waphula umthetho wokuvalwa kwezwe uRhulani Mokwena ( osesithombeni) obengumqeqeshi weChippa United ebimbolekwe yi-Orlando Pirates.
IChilli Boyz imemezele ukuthi ngeke iyelule inkontileka nalo mqeqeshi.
Iminwe eminingi ikhombe kuyena njengoba iChippa isolwa ngokuziqeqesha ekubeni kungakagunyazwa ezweni. IChippa ithe iyaluphenya lolu daba.
Amakilabhu asevunyelwe ukuziqeqesha, kodwa kusamele alandele imigomo ethile ngaphambi kokwenza lokhu.
IChippa kuvele ukuthi iphule lo mthetho yayozilolonga. Nokho-ke iChippa iphumele obala ngokuthi lezi zinsolo kazihlangene nhlobo nokungavuselelwa kwenkontileka yalo mqeqeshi.
Lo mqeqeshi uveze ukuthi akakhumbuli ephula imithetho yokuvalwa kwezwe. Uthi uyiqonda kahle imithetho, ngakho-ke ubengeke enze ubudedengu ajimise abadlali ekubeni iCovid-19 isalokhu iqhubeka nokudlula nemiphefumulo.
“Ngiwumuntu ohlale enza izinto ngokwethembeka. Kangithandi ukunaba kabanzi ngokuhlukana kwami nekilabhu. Kangifuni ukuphawula ngezinto ezingagcina zinyathela abanye abantu amakhona.
"Ziningi izinto ebezikhulunywa, kodwa ngingaphawuli ngazo. Kuvele nokuthi kuzokwehliswa imiholo yabadlali ngenxa yeCovid-19.
“Mina bengingakwazi lokhu ekubeni kuyimina umqeqeshi. Ngenhlanhla ngikwazile ukubonisana noSiviwe Mpengesi ongumnikazi wekilabhu wathembisa ukuthi uzozama ukukhokhela abadlali yize kunzima. Lokhu kokuthi ngijimise abadlali, kangikwazi impela,” kusho uMokwena. Uthi kuningi ayokukhumbula ngeChippa.
UMokwena akaphikanga futhi akavumanga ukuthi angase avumbuke kwiTTM esanda kuthenga ilungelo leBidvest Wits lokudlala kwi-Absa Premiership.
Uthi usazohlala phansi nemenenja yakhe babhunge ngokuthi yini azoyenza. UMokwena uthe okwamanje umatasa namalungiselelo okufihla ilungu lomndeni wakhe elisanda kudlula emhlabeni.
Kuzo ezeChippa, igcine idedele uThabo Rakhale kwazise inkontileka yakhe ibiphela njengoba kusongwa isizini.