Utholwe esecwiyiwe othole izigidi zakwaRAF
Kuthiwa ikhadi likamufi lize langqwamba kuzanywa ukukhipha imali
SITHOLWE sicwiyiwe isidumbu sowesilisa waseMahlambini, KwaNongqingqi, eMzimkhulu okuthiwa wanyamalala emasontweni amabili adlule kungakapheli sikhathi esingakanani ephunyelwe yimali yokulimala engozini yemoto.
Ngokuthola kweLANGA, isidumbu sikaMnu Vukani Madolo (47), sitholwe ngoMsombuluko emuva kokuba umndeni wakhe ububeleselwa ngabantu abangaziwa bethi mawufake imali kwaShoprite noma kwaSpar uma ufuna ukumbona esaphila.
Kuthiwa umufi wayethole imali efikile esigidini ngokulimala, kanti kwenzeka lokhu nje, ubengasahlali kubo, ubesehlala nesinqandamathe sakhe kwenye indawo eqhelile nekubo.
Umthombo weLANGA oseduze nalolu daba, uthi imali yaphuma ngoNhlaba (May).
“Umndeni ubufonelwa nsuku zonke, kuthiwa mawufake imali. Kugcine kungenzekanga lokho ngoba amaphoyisa awudonse ngendlebe athi kungenziwa, kwazise kuzothi uma isifakiwe, kuphinde kufuneke enye,” kusho umthombo.
Utshele leli phephandaba ukuthi kufike amaphoyisa ngoMsombuluko abikela umndeni ukuthi mawuye emakhazeni, kunesidumbu asithole silahlwe eceleni komgwaqo.
Umthombo uthi umndeni ufike emakhazeni isidumbu siboshwe ngozankosi, silinyaziwe ekhanda, ezinye izicubu zomzimba zicwiyiwe.
“Abomndeni bathi indlebe beyingekho, phansi kwesilevu kuvulwe imbobo, ikhala licwiyiwe kanti nasekhanda ubelimele kakhulu,” kusho umthombo.
Uveze ukuthi nangesikhathi sesitholakele isidumbu, belusangena ucingo obelufuna imali emndenini. Uthi usola ukuthi laba abenze lokhu bebengakazi ukuthi sesitholakele isidumbu.
“Indlela abebeyifuna ngayo le mali, bebengafuni ukuchaza izinto eziningi, bebesho inkulumo yabo bavale ifoni, bengafuni nemininingwane yasebhange,” kusho umthombo.
Ikhansela lendawo, uNkk Sindi Nkala, lithi ngokombiko eliwutholile, uMnu Madolo waphuma eya endlini encane kusihlwa, kwaqhamuka imoto, abantu ababehamba ngayo bamphoqa ukuba angene kuyona.
“Ubhuti ubekade engasahlali ndawonye nomama wengane yakhe esehlala nomunye wesifazane. Lona wesifazane uma ebuzwa ngokwenzekile, uthi akabonanga lutho,” kusho uNkk Nkala.
Utshele ILANGA ukuthi ngesikhathi umufi enyamalele, amaphoyisa aphakamise ukuba kuvalwe ama-akhawunti akhe asebhange.
Uthi kungenzeka ukuthi ababulali badinwe wukuthi kayiphumanga imali ngoba ikhadi kuvelile ukuthi lingqwambile emshinini ngesikhathi, kuzanywa ukukhipha imali.
Okhulumela amaphoyisa KwaZulu-Natal uCapt Nqobile Gwala, usiqinisekisile lesi sigameko. Uthe kutholakale isidumbu sowesilisa oneminyaka ewu-47 ubudala sinanxeba okudutshulwa esiphundu.
Owesilisa wathunjwa mhla ka-12 kuNhlangulana (June), kuvulwe icala lokubulala eliphenywa esiteshini samaphoyisa eNsikeni,” ku-sho uCapt Gwala.
Imizamo yokuthola umndeni kamufi kayiphumelelanga ngenxa yokuthi indawo okuyona kunzima ukuba utholakale ngocingo.