Uphindwe okwamenza kwiPirates exoshwa
Umqeqeshi uthi bebengeke bakwazi ukuholela umuntu ongadlali
UMQEQESHI weSuperSport United uveza okulimaze uThabo “Section 10” Qalinge ofakwe amasondo kule kilabhu ayijoyine esuka kwi-Orlando Pirates.
UKaitano Tembo ocija le kilabhu uthe baphoqelekile ukumdedela lo mdlali ngoba ubengasekho ezinhlelweni zakhe. UQalinge nakwiBucs ubehlushwa wukulimala, okwenze wagcina esephelelwe yindawo esikimini. Lesi simo siqhubekile noma esejoyine iSuperSport.
“Ngikholwa wukuthi uQalinge umoshwe wukulimala njalo.
Abadlali abadlala endaweni yakhe bebeqhubeka nokugila izimanga.
Lesi simo siholele ekutheni aphelelwe yindawo ekilabhini.
Ikilabhu inomthwalo wokwehlisa izindleko njengoba ishayekile ngenxa yeCovid-19.
Besingeke sikwazi ukuholela umuntu ongadlali ekubeni ikilabhu ishayekile kwezomnotho. Simufisela okuhle kodwa empilweni yakhe,” kusho uTembo.
Lo mqeqeshi ubuye waqinisekisa indaba ka-Iqraam Rayners ozobajoyina uma kuphela isizini njengoba esayine i- pre-contract esuka kwiStellenbosch FC. Uthi ubefisa ukuthi lo mdlali asheshe abajoyine ukuze ezobamba ngokushesha isitayela sekilabhu. Uthi uRayners unekhono elihle lokukwazi ukuqobela amagoli ngendlela esezingeni eliphezulu.
Uthi kuningi asakulindele kuAubrey Modiba ongomunye wezethenjwa zale kilabhu. Lo mdlali ngesizini edlule ushaye amagoli awu-9 kanti kule sizini usenamathisele awu-5.
Sekuwumlando ukuthi uModiba uvundululwe ohlelweni lweKe Yona obeluqhutshwa ngabadidiyeli beNedbank Cup engakasongwa kule sizini.