Phansi ngodlame kwabesifazane
MHLELI: Ngiyafisa kuhlanganiswe bonke laba asebetholakele namacala okubulala abesifazane babuzwe ukuthi yini lena edale bagcina sebegila le mikhuba.
Ngibona singeke siphele lesi sihlava ngoba owesilisa ubulala owesifazane qede aboshwe, izwe lingatshelwa isizathu esiholele ekutheni aze akhiphe umphefumulo. Sizolokhu sisala siqagela, singazi ukuthi ngempela yini umnyombo wale nto eyenza amadoda aphenduke izilwane.
Ngicela-ke abesifazane bazame ukuzimela manje, mhlawumbe nakho ukuqoma owesilisa ngoba uzifunela imali kunawo umthelela wokugcina ubulawa. Abanye kuye kuthi uma uthando lusavutha amalangabi basebenzise imithi ethile kanti kuzohamba kube noshintsho othandweni lwabo, owesifazane agcine eseqoma okanye esemshiya lona wesilisa.
Kuye kwenzeke-ke endodeni efakwe le mithi kungabi lula ukushiywa ngumuntu emthandayo, ivele ibone umhlaba uyiphelela.
Ngike ngabona ezinkundleni zokuxhumana abesilisa bebhala ukuthi ukucela intombi wu-R15 000, izinkomo eziwu-11 zibiza u-R66 000 kuya phezulu, kuzoba umkhehlo ngo-R50 000, izibizo bazibalela ku-R40 000 neminye imicikilisho engeke ngayibalula nayo efuna imali kanjalo nomshado.
Uthola ukuthi owesilisa usehlanganise kanzima imali engango-R400 000 imnyaka ngoba ethi ufuna ukuganwa, owesifazane avele aqome. Owesilisa usezikweletini njalo, usakhokha le mali.
Kokunye owesilisa ubefundisa owesifazane emfundweni ephakeme, ekhipha enkulu imali le, owesifazane avele aqome emsebenzini, akhohlwe yilona wesilisa omenze waze wathola umsebenzi.
Kwenzeke njalo owesilisa ubesekhiphe eningi imali eyinika owesifazane emenzela konke akufunayo. Kangisho ukuthi kunjalo, kodwa ngithe mangithathe izinkulumo ezikhulunywa ngamadoda ezinkundleni zokuxhumana ngase ngizihlanganisa nengizibona zingaholela owesifazane agcine esebulawa ngoba owesilisa esecabanga amandla nobunzima asedlule kubo qede azoshiywa noma ajolelwe.
Abesilisa bayafana, bayahluleka wukwamukela ukujolelwa, ikakhulukazi ngumuntu abasuke sebekhiphe eshisiwe imali ngaye. Noma kunjaloke, zinsizwa zakithi, mina ngithi masehliseni imimoya siqinisele kunzima kunjalo.
Kungcono sibayeke kunokubabulala, ngoba ukubulala umuntu kuyokwenza uphile kanzima udliwa wunembeza, kuhle sivele sibanikele eNkosini kube yiyona ebonayo.
Imvamisa abanye abantu banokucabanga ukuthi konke okwenzayo ukwenza ngoba nithandana, kube lula kubona ukuthi uthando luphelile bafune nowesilisa amukele kalula.
Nani bantu besifazane, khulumani ngezinkinga ningakadali ezinye izinkinga. Kayikhulumeki inkinga sekunenye inkinga. Uma unganeliseki, mcele umuntu wakho uhlale naye phansi nilungise izinkinga umlekelele ngoba ukujola akusona isixazululo.
Kanjalo nathi madoda, masibenze abantu bethu besifazane bakwazi ukuxoxa nathi, singabi nolaka nemibuzo eminingi njengokuthi lokhu okushoyo ukufundephi noma ukuthathaphi.
Ake sibambisane othandweni, sonke sizehlise, sikhulume ukuze sigweme izinkinga. Ngiyafisa abesifazane bafunde ukuzimela, bakuyeke ukuthi indoda kumele ibanike imali ngoba le mali anikwa yona angagcina eseyifela ngelinye ilanga.
Phansi ngokudlwengula! Phansi ngokubahlukumeza! Phansi ngobulwane!
Bantu besilisa, masibathande sibanakekele, sibahloniphe abantu besifazane. Bangamaqhawe, sikhona nje yibona. Uma sesibulala amaqhawe ethu asithwala izinyanga eziningi kangaka, ngabe yiyona ndlela yokuwabonga leyo?