Ukulivala thaqa izwe kungaguqisa umnotho ontekenteke
UNGQONGQOSHE wezeMfundo, uNkk Angie Motshekga nozakwabo bezifundazwe, bathathe isinqumo esiphusile ngokuvumela kuphela amabanga amathathu ukubuyela esikoleni namuhla ngoMsombuluko njengoba izwe libhekene neCovid-19.
Isizathu sokungabuyeli esikoleni kwamanye amabanga wukuthi lo mnyango uthi kawukakulungeli ukuthatha umthamo omkhulu wabafundi. Umnyango umemezele ekupheleni kwesonto eledlule ukuthi kuzovunyelwa kuphela abafundi baka-Grade R, u-6 no-11 ukuqala ukufunda kusasa - abazoqhubeka nabafundi bakaGrade 7 no-12 bona abaqala ukufunda ziwu-8 kuNhlangulana (June).
UMnyango wezeMfundo waKwaZulu-Natal wona ucele ukuba ungavuli uGrade R, ngoba uthi kawukakulungeni ukuthatha lesi sinyathelo ngenxa yezingqinamba ezithile. Lo mnyango ulandelwe ngowaseLimpopo kulesi sinqumo.
Naphezu kwezinkinga eziningi eziphikisana nokuvulwa kwezikole, iqiniso wukuthi impilo kufanele iqhubeke, yingakho sihambisana nokuvulwa kwamabanga athile inqobo nje uma izikole zizokwazi ukuwalawula kalula, futhi zinikiwe wumnyango izinsiza zezempilo zokunqanda ukubhebhetheka kwegciwane.
Empeleni kuningi vele okwathenjiswa wuhulumeni ukuthi uzokwenza ukuphephisa izingane zethu kulolu bhubhane olubhebhethekisa okomlilo wequbula, ikakhulukazi ezifundazweni ezintathu eNingizimu Afrika; okuyiWestern Cape, i-Eastern Cape neGauteng, kodwa zangagcinwa izethembiso. Isimo sesisibi eGauteng, kunemibiko ethi uhulumeni wakhona unxenxa okazwelonke ukuba usivale thaqa ( lockdown) lesi sifundazwe, sibuyele esigabeni 5 njengoba kwenzeka ngoNdasa (March).
Umbuzo ngalesi siphakamiso uthi ngabe lokhu kungawenza yini umehluko ukusindisa impilo yabantu. Kufanele sikhumbuzane phela ukuthi uhulumeni kazwelonke wathi isizathu sokuvalwa kwezwe ekuqaleni kwakuwukuwunika isikhathi esanele sokulungisa izibhedlela nezinye izikhungo zezempilo ukuze kuthi uma sekufika isishingishane, abezempilo babe sebemi ngomumo, bakwazi ukubhekana nesimo.
Lo hulumeni ubenezinyanga ezimbili golokoqo, usitshela ukuthi ulungiselela lesi simo esesifikile njengamanje. Izikhulu zikahulumeni bezenzani kanti sonke lesi sikhathi nxa sezingenwa ngamanzi emadolweni, zicela ukuba kuvalwe izingxenye ezithile zezwe ukunqinda amandla egciwane?
Uma leli gciwane liqhubeka libakhona phakathi kwethu iminyaka emibili ezayo, njengoba kuxwayisa abanye ososayensi, ngabe lokhu kuyosho ukuthi kufanele kume yonke into ezweni iminyaka emibili ezayo? Ukuvalwa kwezwe thaqa futhi ngeke kube yisinyathelo esiphusile ngoba kungaguqisa umnotho ovele ubangwa nezibi.
Osekuhlalukile ngokufika kwaleli gciwane wukuthi sihleli phandle kuleli zwe, kakufanele sithembele kuhulumeni ngoba kuyacaca ukuthi izinhlaka zawo zintekenteke, kazikho esimeni sokusihlenga uma sibhekene nezinhlekele.