Sikhulu isililo kushona owe-ANC
KULILA namaqembu aphikisayo ngokudlula emhlabeni komkhulumeli weANC KwaZulu Natal, uMnu Ricardo Mthembu, odlule emhlabeni izolo ngoLwesithathu esibhedlela saseBallito.
UMnu Mthembu kuthiwa udlule emhlabeni ngokugula okuhambisana neCovid-19.
Umholi weDA KwaZulu-Natal, uMnu Zwakele Mncwango, ungomunye wabaholi ababhonge emswanini ngokudlula kukaMnu Mthembu.
“Egameni leDA KwaZulu-Natal, ngithanda ukudlulisa amazwi enduduzo emndenini kamhlonishwa uMthembu nasemndenini wakhe wezepolitiki, i-ANC,” kusho uMnu Mncwango oveze ukuthi usuku lwayizolo lube ngoludabukisa kakhulu KwaZulu-Natal.
Umchaze njengomunye wabaholi abebezinikele.
“Silahlekelwe kakhulu, esingakusho nje wukuthi umphefumulo wakhe sengathi ungaphumula ngokuthula,” kusho uMnu Mncwango.
UMengameli we-IFP ophinde ahole leli qembu eSishayamthetho saKwaZulu-Natal, uMnu Velenkosini Hlabisa, naye udlulise amazwi enduduzo. Uchaze uMnu Mthembu njengomholi obezinikele ngemibono yakhe eyakhayo.
Uveze ukuthi uzokhumbuleka ngokuba ngumuntu okhululekile futhi onobungani.
“Nakanjani kuzovuleka esikhulu esikhala esishayamthetho ngokudlula kwakhe emhlabeni. Sidlulisa amazwi enduduzo emndenini wakwaMthembu naseqenjini lakhe, i-ANC,” kusho uMnu Hlabisa.
USomlomo weSishayamthetho saKwaZulu-Natal, uNkk Nontembeko Boyce, uthe lezi zindaba zibashaqisile kakhulu, kwazise bebesalindele lukhulu ebuholini bukaMnu Mthembu.
Umchaze njengobezinikele ekwenzeni umsebenzi wakhe wokuhola ikomidi loMnyango wezoHulumeni baseKhaya nezoMdabu KwaZulu-Natal.
UMnu Mdumiseni Ntuli, ongunobhala we-ANC esifundazweni, uthe leli qembu lilahlekelwe kakhulu ngoMnu Mthembu njengoba ubengagcini ngokulikhulumela, kodwa ubebuye alimele esishayamthetho.
Uthe miningi neminye imisebenzi ajutshwe yona yileli qembu futhi wayenza ngokukhulu ukuzinikela. Unxuse ozakwabo kwi-ANC ukuba bangadikibali ekulweni nalesi sifo njengoba sekucacile ukuthi sidla fumuka, sidla silaza.
UNdunankulu waKwaZulu
Natal, uMnu Sihle Zikalala, uthe uMnu Mthembu udlule ngokukhulu ukuzuma kanti basashaqekile ngalezi zindaba.
Ngaphambi kokukhulumela i-ANC, uMnu Mthembu ubeyimeya yaKwaDukuza amahlandla amabili, kanti uqokwe izikhawu ezintathu ekubeni nguSihlalo we-ANC esifundeni iGeneral Gizenga Mpanza ngaphambi kokuba ajoyine isishayamthetho ngonyaka odlule.
Ngo-2018 wahlonishwa ngeziqu zobudokotela zeTheology yi-Independent Theology Institute.
Ubesesigungwini esiphezulu seANC esifundazweni (KZNPEC).