UMFUNDISI UBULAWE "EHAMBA NENTOMBI"
UBEHAMBA nowesifazane emishini umfundisi wamaSheshi oThongathi othelwe ngentululwane yezinhlamvu wafa ngoMsombuluko ebusuku, kungakapheli ngisho inyanga ILANGA lilobe ngokushona kwenkosikazi yakhe okwavela ukuthi izibulele ngoba isikhathele ngumyeni wayo “oyisoka lamanyala”.
ILANGA lithole ngemithombo yalo ukuthi uMfu Sandiso Sithole (41) - okusanda kufihlwa umkakhe uNkk Nomthandazo Sithole (40) - ubulawa nje, ubehamba ngemoto nalona wesifazane okuthiwa ngowakhona endaweni, beyongena emishini ngesikhathi behlaselwa yizelelesi.
ILANGA linalo igama lalona wesifazane okuthiwa nguyena onekele amaphoyisa ngakho konke okwenzekile.
Kuthiwa uzichaze njengentombi kaMfu Sithole esitatimendeni asibhale emaphoyiseni.
Leli phephandaba lithole ukuthi nakuba lona wesifazane usindile, yingoba kuthe uma kuduma izulu lezandla, lilelesa umfundisi obevula isango lasemishini ngaleso sikhathi, yena wacasha ngezihlalo zemoto abehleli kuyona.
Lishone elangoLwesibili isithombe salo wesifazane, osolwa ngokuba yintombi yomfundisi, sisabalele ezinkundleni zokuxhumana, abantu bemchapha ngenhlamba, bemsola ngokuba nesandla ekushoneni kukaNkk Sithole.
Kuthiwa ngesikhathi kungcwatshwa uNkk Sithole, wayekhona nalo wesifazane.
Umfundisi ubulawa nje, umndeni wenkosikazi yakhe ubusuqashe abaphenyi abazimele ngokubulawa kwayo, kwazise kuthiwa ubungakholwa ukuthi yazibulala.
ILANGA labika kabanzi ngokutholakala kwesidumbu sikaNkk Sithole owayenguthisha, sisemotweni yebandla ebihamba umfundisi.
Labika ukuthi isidumbu satholwa kukhona neBhayibheli eceleni kwaso neheheba lencwadi okukholakala ukuthi yabhalwa nguyena ngaphambi kokuba azibulale.
Kule ncwadi wayesola umyeni wakhe ngokungaziphathi kahle emshadweni wabo, emsola ngokushintshanisa abesifazane, abanye babo abakhona kulona leli bandla.
ILANGA lithole ukuthi ngemuva kosuku olulodwa uNkk Sithole wangcwatshwa emakhaya eMelmoth, umfundisi wabuyela emishini.
Amalungu ebandla akhulume neLANGA ngombandela wokuba kugodlwe amagama awo, kwazise lolu daba lubucayi, ancome uMfu Sithole athi ubenesiphiwo esiyisimanga sokushumayela.
Athi ubukhohlwa zonke izinsizi obhekene nazo uma eseme epulpiti, kanti imisebenzi yakhe nabesifazane ibingafani naye.
UMfu Ndabezinhle Sibiya, oyiDean yeDiocese of Natal kuleli bandla, ukhiphe isitatimende eqinisekisa izindaba zokubulawa kukaMfu Sithole.
Unxuse abazalwane ukuba babeke umndeni wakwaSithole emkhulekweni kulesi simo obhekene naso, wathi bazokwaziswa ngezinhlelo zamalungiselelo omngcwabo wakhe.
Okhulumela amaphoyisa KwaZulu-Natal, uCol Thembeka Mbhele, uthe amaphoyisa aphenya icala lokubulala, bekungakaboshwa muntu.