BALAXAZE IZIGULI BEFUNA KUHLANZWE ISIBHEDLELA
BALAXAZE iziguli izolo ngoLwesithathu bangenela umbhikisho ongekho emthethweni abahlengikazi basesibhedlela iCatherine Booth, eMatigulu, bekhala ngokungakhucululwa kwendawo abasebenzela kuyo uma kukhona otholwe ene-Coronavirus.
Laba bahlengikazi bathi uma kukhona isiguli noma umhlengikazi otholwe enaleli gciwane, kuyaqhutshekwa nokusebenza sengathi akwenzekanga lutho.
Kuthiwa abahlanzayo batshelwa ukuthi mabahlanze ngesibulalimagciwane okuthiwa yi- biocide.
Ekhuluma neLANGA omunye wabahlengikazi, ocele igama ligodlwe, uthi kabahlolwa akukhatheleki noma bamthintile yini lowo muntu noma cha.
"Kasihlolwa futhi asinikwa isikhathi sokuyogonqa uma sithintane nosetholakale naleli gciwane, siyaqhubeka nomsebenzi njengenjwayelo.
"Usuku nosuku kulesi sibhedlela, iwadi newadi, kunabahlengikazi ababili noma abane abatholwa benaleli gciwane.
"Siyeke ukusebenza ngoba sifuna kuhlanzwe uma kunothelelekile, hhayi kuyekwe nje, noma ngabe kuhlanzwa sikhona endlini ngoba sesizwile ungqongqoshe ethi ngeke zisavalwa izibhedlela uma kukhona onaleli gciwane.
"Uma sishayisa ntambama, sesisaba ngisho ukuya emindenini yethu ngoba sisaba ukuyithelela ngegciwane.
"Uzakwethu uphume emsebenzini engenalutho kanti usethelelekile, wathelela umyeni wakhe ekhaya washona,” kusho yena.
Uthi abaphathi babatshela ukuthi bazozilandelela izikhalo zabo, mabaqhubeke nokusebenza, okuyinto abaziyo ukuthi ngeke yenzeke.
“Ngikhuluma nje, iwodi labaneCovid-19 nelabanesifo sofuba esibizwa ngeMDR, lihlukaniswe ngentambo ebomvu ( danger tape), angazi noma babona ukuthi i-Corona izobona i- danger tape bese iyama ingadluleli yini kwabaneMDR,” kusho yena.
Imizamo yokuthola uvo loMnyango wezeMpilo KwaZulu-Natal iphunzile, izingcingo zabawukhulumelayo bezingabanjwa. lithumele ne- e-mail yangaphendulwa.