UMNDENI UFUNA ISINXEPHEZELO "NGOBUDEDENGU" BESIBHEDLELA
UFUNA isinxephezelo sika-R20 million umndeni wowesilisa waseGroutville okuthiwa uhlale izinyanga ezimbili nebhandishi esiswini okusolwa ukuthi lasala ngesikhathi ehlinzwa esibhedlela iJuctice Gizenga Mpanza Regional, KwaDukuza.
Lo mndeni usola lesi sibhedlela ngobudedengu emuva kokuhlinzwa kukaMnu Vukani Masinga (20), mhla ka-19 kuNdasa (March) owayengeniswe kusona ngenxa yokuxinwa yizinkinga ze- appendix.
UMnu Philani Masinga okhulumela umndeni wesisulu, uthi selokhu kutholakale leli bhandisi kuVukani, usefana nomuntu okhubazekile njengoba esehlala elele, ehamba egoba ngenxa yenkebenkebe yesilonda esingapholi esiswini.
UMnu Masinga uthi isisulu besixinwa yizinhlungu, emuva kokuba sidedelwe esibhedlela. “Ngesikhathi efika ekhaya, umthungo wawumhlupha umfimfa ubovu, kangangoba waze waqhuma kwaphoqeleka ukuba simphindisele esibhedlela. Bafike bamqaqa izitishi, bahlanza isilonda bamdedela.
"Kwaqala lapho ukuthi kuphume ubovu obunuka ngendlela engabekezeleki, kangangoba wawungeke ungene endlini alele kuyona ngenxa yephunga.
"Esibhedlela basinika usuku okumele abuyele khona ngalo, okwathi kungakenzeki lokho, savalwa ngenxa yeCoronavirus, kwaphoqeleka ukuba silinde.
"Sasimyisa emtholampilo wendawo kodwa nakhona bagcina bexakeka ngoba isilonda besilokhu sibhibha, siphuma ubovu.
"Kuthe sekuvuliwe esibhedlela, samphindisela khona, udokotela wamhlola wathola ukuthi kunebhandishi elingaphakathi, elasala ngephutha ngesikhathi ehlinzwa okokuqala,” kusho yena.
Uthi isimo sinzima kumfowabo njengoba engasakwazi ukuzenzela izinto. Utshele ILANGA ukuthi uVukani ubedlala ibhola endaweni kodwa useliyekile ngenxa yalesi simo sempilo.
Ummeli walo mndeni, uMnu Mbuyiselo July weDlamini July Attorneys, ukuqinisekisile ukuthi lukhona udaba alusebenzayo lwalo mndeni, kanti useyenzile nencwadi efuna lesi sinxephezelo.
Ebuzwa ngesamba semali efunwa wumndeni, uthe okwamanje ngeke akwazi ukuphawula ngalokho.
Okhulumela uMnyango wezeMpilo KwaZulu-Natali uMnuz Ntokozo Maphisa uthe: "Nakuba umthetho ungavumi ukuba sidalule imininingwane eyimfihlo ngokwenzeka phakathi kwesiguli nabezempilo, isiguli bekulindeleke ukuba sibuye sizothola usizo izikhawu zaze zambili, sangafika.
"Sekwenziwe nezinhlelo zokuba isiguli sibonwe yinhloko kwezokuhlinzwa ngaphakathi esibhedlela. Nasemuva kokuthintwa yiLANGA kube nzima ukuthola esigulini ukuthi singabuya nini. Isiguli sivumelekile ukubuya noma yinini." ukuze sixilongwe siqhubeke nokuthola usizo."