Othisha 'bathukwe' unesi
BAYAVEVA yintukuthelo othisha nezisebenzi zaseBerg Street Primary School, eMgungundlovu, ngokuphoxwa yisisebenzi sezempilo ebesijutshwe ukuyobahlola i-Coronavirus ngoMsombuluko, okuthiwa sishiye esingalazi kubona.
Kuthiwa sibatshela emehlweni ukuthi bangenwa yizifo ngoba babudedengu kunjalo nje, uhulumeni kawunayo imali yezinsiza zokubahlola, ngakho mabaye kodokotela abazimele babahlole ngama- medical-aid abo ngoba bayasebenza.
Lab’ othisha bathi bazizwa behliswe isithunzi ngokudelelwa yilo nesi wase-East-Boom Health Centre, khona eMgungundlovu - ILANGA elinalo igama lakhe - obehamba nozakwabo kuyohlolwa othisha nezisebenzi emuva kokuba kutholwe uthisha nomfundi abane-Coronavirus.
Omunye wothisha okhulume neLANGA ngombandela wokuba igama lakhe ligodlwe, uthi sebelibhalele iHhovisi loMnyango wezeMpilo esiFundeni uMgungundlovu bekhala ngalokhu.
ILANGA liyibonile le ncwadi ethunyelelwe umnyango ukuze uxhumane nowezemfundo ilungiswe le ndaba yokweyiswa kwabo. “Kasizikholwanga izindlebe zethu sitshelwa ngumhlengikazi oqeqeshiwe ukuthi ngeke size sihlolwe, masiye kodokotela ngoba sinama- medical aid.
"Lapha esikoleni sinothisha abevile ku-40 abazimisele ngokuhlolwa njengoba iningi labo lisho ukuthi linezimpawu zeCovid-19. Njengoba sekunomfundi nothisha abavele sebehlabekile nje, sonke siyafuna ukuhlolwa kodwa sivinjwe ngabezempilo.
"Sinovalo lokuthi hleze nesisondelene nabo sibathelele ngalokhu kugula ngoba lo thisha okutholakale ukuthi une-Corona, besisebenzisa izinto eziningi naye.
"Lo nesi onqabe ukusihlola, uthe uzohlola abathathu abebesondelene kakhulu nalo thisha, thina abanye masiye kodokotela bethu ngoba sihola kahle.
"Usitshele nokuthi sisazobhubha yizifo ngoba kasizwa futhi nohulumeni usukhathele ngamahlongandlebe angafuni ukuwulalela uma ukhuluma. Ngendlela abekhuluma ngayo, bekungathi imali yokusihlola iphuma ephaketheni lakhe.
"Usitshele ukuthi umuntu ngamunye ubiza u-R1 000 uma ehlolwa,” kusho lo thisha.
Uthi bayazisile isekethe yabo ngalokhu kuphoxwa, kodwa bafuna nezwe lazi ukuthi mngakanani umqansa ababhekene nawo emsebenzini wabo.
Uthe kuyaxaka ukungahlolwa kwabo ngoba ezinye izikole ezisesifundeni saseMgungundlovu, okutholakale ukuthi kukhona asebehlabekile, bahlolwe bonke othisha ngaphandle kwemibandela.
Okhulumela uMnyango wezeMfundo KwaZulu-Natal, uMnu Muzi Mahlambi, uthe uhulumeni uyaxolisa ngokwenzeke kothisha, wathi akekho umuntu onegunya lokukhuluma kabi komunye umuntu.
“Sizongenelela siwumnyango, sixhumane nomnyango wezempilo esifundeni saseMgungundlovu ukuze basizakale labo thisha.
"Kasikho isisebenzi esinelungelo lokugcwanekela esinye noma ngabe ngeke sikwazi ukusiza,” kusho uMnu Mahlambi.
Ekhuluma neLANGA, uNkk Noluthando Nkosi okhulumela uMnyango wezeMpilo KwaZuluNatal, uthembise ukubuyela kuleli phephandaba uma esezibonile izikhalo zalabo thisha ngokuphatheka kabi kwabo. editor@ilanganews.o.za