Ufuna ukudlondlobala kwezolimo
Njalo ngesonto uthumela izinkukhu koMasipala uPhongolo, uMkhanyakude nesibhedlela Obonjeni
USEZINHLELWENI zokuphendula umhlaba wesizwe sakwaGumbi, eCondova, oPhongolo, isizinda sezolimo usomabhizinisi osemncane wakule ndawo othi ukhuliswe ngabazali abakuthandayo ukulima.
UMnu Sibusiso Gumbi (35), ongumnikazi weSomkhanda Farming Project ekhulisa idayise izinkukhu nezingulube itshale nokudla, uthi watshela abazali bakhe esemncane ukuthi ufisa ukufunda kabanzi ngezolimo, okwadala ukuba bamyise eSinethemba High School, ePiet Ritief, kwazise lesi sikole sinazo izifundo zolimo.
"Bangiqalisa kulesi sikole kusukela ngifunda u-Grade 7 kuya ku-12. Kulesi sikole ngafunda izinto eziningi ngokulima, ngaqeda kusona sengazi nje ukuthi ngizoba ngumlimi,” kusho yena.
Uthi ngesikhathi enza umatikuletsheni, wazama ukuthola isikhala sokufunda eMangosuthu University of Technology (MUT), eMlazi - efuna ukuqhubeka nezifundo zolimo - ngeshwa kwangalunga ngoba amaphoyinti akhe ayephansi.
“Ngaya eFutura Finishing School, eThekwini ngenza umatikuletsheni okwesibili, kodwa ngeshwa ngangingeke ngisakwazi ukuyofunda ngoba ngase ngithole umntwana, okwaphoqa ukuba ngiyofuna amatoho,” kusho yena.
Wathola umsebenzi egaraji lokuthela uphethiloli KwaDambuza, eMgungundlovu wasebenza izinyanga eziwu-6 waphela umsebenzi kwaphoqa ukuba abuyele oPhongolo.
Uthi amasentshana abewathola ubewathumelela kubo athi mabamthengele izingulube bamgadele zona. Emuva kwesikhashana, wathola itoho lokusebenzela umnyango wezemfundo izinyanga ezine.
“Ngo-2016, ngathola ithuba lokuyoqeqeshwa iminyaka emibili enkampanini yakwaSasol eSecunda (eMpumalanga), ngiqeqeshelwa ukuba yi- process artisan. Sengiqedile ukufunda, ngaqashwa yiyona iSasol ngokugcwele,” kusho yena.
Uthi ngisho esebenza kule nkampani enkulukazi, ubesalokhu eqhubekile nokuthenga imfuyo, acele kubo ukuba bamgadele yona.
Uqome ukushiya emsebenzini ngonyaka odlule ukuze afeze iphupho lakhe lokuba ngumlimi.
“Ngikhethe ukuqala leli bhizinisi ngokugcwele ngemali engiyenze ngesikhathi ngisebenza kwaSasol ngabe sengihlangana nomunye wabangani bami, uMnu Bhekani Ndabandaba sangena ngokugcwele kuleli bhizinisi ngoba sobabili sinothando lokulima,” kusho yena.
Uthi nakho ukusungula iSomkhanda Farming Project, akubanga lula njengoba kwadingeka ukuba baqale bathole indawo abazokwazi ukukhulisela kuyona izinkukhu.
Utshele ILANGA ukuthi izingqinamba kazibavimbanga ukuba baphokophelele empumelelweni, kodwa yizo kanye ezibenza basebenze ngokuzikhandla.
“Sesisebenza, sithole ukuthi abantu abaningi kabathandi ukuzichuthela izinkukhu njengoba bebefuna sibadayisele zona sezichuthiwe.
"Kube khona ongitshela ngomshini wokuchutha izinkukhu nowokusika inyama - ngoba besifisa ukuphinde siyenze ibe yimibengo - sayithenga le mishini," kusho yena.
Uthi bathenga amachwane esenosuku olulodwa nje vo ezelwe, bawakhulise aze abe namasonto awu-6 ubudala.
Uchaza le ngxenye yomsebenzi webhizinisi labo njengenzima kakhulu, kwazise kusuke kuyisikhathi esibucayi emachwaneni. Njengamanje banezingulube ezingaphezu kuka-30.
Uthi ngosizo lweNkosi yakwaGumbi (iNkosi Zeblon Gumbi), babe nenhlanhla yokulekelwa yisikhwama esenganyelwe wubukhosi, i-Emvokweni Community Trust, esibanike izinsizakusebenza nendawo abangayisebenzisa.
“Sithe uma sibuka le ndawo, sabona ukuthi abantu abaningi abazothenga izitshalo ikakhulukazi eJozini, badlula kithina ngaphambi kokufika emapulazini abathenga kuwona.
"Sibone kubalulekile ukuba nathi siqale sitshale amaklabishi, upelepele notamatisi ngoba indawo esikuyona iyavumelana nalezi zitshalo,” kusho yena.
Uthi kalukho olunye uxhaso lwemali aseke baluthola kuleli bhizinisi, kodwa uMasipala wasoPhongolo uke wabalekelela ngokuba bayofunda kabanzi ngebhizinisi lezinkukhu.
Ngasekupheleni konyaka odlule uthi ube nenhlanhla yokuhlangana nowesifazane waseRichards Bay, obanike inkontileka yokuba bamdayisele izinkukhu ezingaphezulu kuka100 njalo ngesonto.
Uthi lokhu kulikhulise kakhulu ibhizinisi labo okumanje selinamakhasimende ayizisebenzi zikaMasipala wasoPhongolo, owaseMkhanyakude nezasesibhedlela sasoBonjeni.
“Izinkukhu zethu siyaqinisekisa ukuthi kazilingani ngokobudala, ukwenzela ukuthi ibhizinisi lingami kusalindwe ukuba zikhule ukuze zilungele ukubulawa.
"Siyaba nezingaphezulu kuka400 esezilungele ukudayiswa noma ukubulawa bese kuba neziwu-200 ezisakhula bese kuba ngamachwane angalinganiselwa ku-300 ngesikhathi,” kusho yena.
Ngaphandle kweSomkhanda Farming Project, uMnu Gumbi ungumnikazi weNomazulu Trading, eyenza imisebenzi eyahlukene eMnyangweni wezeMpilo eMkhanyakude.
"Ngifisa ukukhuthaza intsha yakithi ukuba ingene kwezolimo ngoba isimo sempilo nesomnotho esikusona njengamanje, sidinga kakhulu intsha ezoqhamuka nezindlela ezintsha kwezolimo,” kusho yena.