Sizimisele ngokwenza umehluko eNquthu
MHLELI: Ngingathokoza ukuthola isiqeshana nje kwelakho elihluba udlubu ekhasini, ngike ngisike elijikayo ngezinhlelo ezinhle ezizokwenziwa yintsha yaseNquthu.
Kuneqembu lakuFacebook elibizwa ngoMgosi waseNquthu, okumanje limatasatasa nokuhlanganisa amasenti ukuze likwazi ukwelula isandla kulowo mndeni noma kuleyo mindeni eyokwazi ukuthi ixoshe ikati eziko okwalolo suku.
Lokhu siqhamuke nakho njengoba sibona izwe lethu libhekene nobunzima ngenxa yeCovid-19, iningi libhuqwabhuqwa yindlala.
Sibone kukuhle ukuba sihlanganise imibono yokuthi nathi siwuMgosi waseNquthu silekelele ngokuthile kulesi sikhathi, mhlawumbe noma ngezijumbane zokudla emindenini emibili emithathu yaseNquthu.
Nakuba iningi lethu lingasebenzi, kodwa uthando nentshisekelo kukhona. Umuntu uyokhipha okuncane anakho. Besingajabula nje uma singabona noma osomabhizinisi baseNquthu besixhasa kulolu hlelo esinalo.
Lesi sikhathi esibhekene naso sidinga ukubambisana kakhulu, singalokhu sigxeka uhulumeni, kodwa nathi siwumphakathi kube neqhaza esilibambayo emiphakathini esiyakhele.
Ake sime kancane ukukhomba uhulumeni ngakho konke ekubeni nathi sihleli sisonge izandla, singalekeleli ndawo. Uma nje nihlangene, nisho ngazwi linye ezinkundleni zokuxhumana, kuningi eningakwenza nakuba sekwanda lesi sihlava sokuthi amaqembu amaningi koFacebook akhuluma ngemikhuba nangenhlamba.
EMgosini waseNquthu ngeke ukuthole lokho, kunabantu asebekhule ngokwanele manje, ongeke ubabone bekhuluma noma ikanjani ezinkundleni zokuxhumana ngoba kungathunaza isithunzi sabo ngalokho.