Yithina esizoxazulula izinkinga zodlame kuleli
EPHEPHANDABENI langoMsombuluko sishicilele udaba olufikisela ngezinyembezi kumfundi, mayelana nokubulawa ngesihluku kwamalungu omndeni wakwaHadebe eminyakeni ewu-20 eyedlule nokwehluleka kwamaphoyisa ukwenza umsebenzi wawo wokubopha abenzi bobubi.
Lesi sigameko sokubulawa kwezinsizwa ezimbili zakwaHadebe senzeka eDube Village, eNanda, eThekwini. Ukukha phezulu nje, okukhalisa umndeni wakoBhungane wukwehluleka kwamaphoyisa ukubopha izinswelaboya noma-ke nje, ukunika lo mndeni umbiko ngokuqhubekayo ngophenyo alwenza ukuzama ukubopha ababulali.
Lo mndeni usola ukuthi imigulukudu yabe iyingxenye yamaqembu ezigelekeqe ezazigcweleza izakhamizi kule ndawo ngaleyo minyaka.
Isizathu esenze sanquma ukushicilela lolu daba, wukuthi luveza isimo esibhekene nemindeni eminingi empisholo emakhaya nasemalokishini, lapho abantu bakithi bedlala imigulukudu mihla le, kodwa kungabi bikho okutheni okwenziwa ngabomthetho ukubavikela.
Sekuyisinkwa semihla ngemihla ukuba imindeni engenacala ingenelwe yizigebengu ezihlomile emakhaya ayo ilele, igcwelezwe. Abesifazane bayadlwengulwa, kanti abanye abantu bayabulawa. Izibalo zakamuva zobugebengu ezakhishwa wumnyango wezamaphoyisa, zikhombisa ukuthi kubulawa ngesihluku abantu abawu-58 njalo ngosuku kuleli.
Okuqeda ithemba wukuthi isibalo esiphezulu sobugebengu sesibekhona iminyaka eminingi, kodwa kawubonakali umehluko naphezu kokuqashwa kwamaphoyisa amaningi, nezethembiso zongqongqoshe zokuthi ubugebengu buzonqotshwa.
Kunabathile eNingizimu Afrika abanombono wokuthi ubugebengu budalwa wukuthi baningi abantu abangasebenzi, yingakho begcina benza ubugebengu ukuzama ukuziphilisa.
Okudidayo ngalo mbono wukuthi ubugebengu kuleli bujwayele ukuhambisana nodlame olunyantisa igazi. Umbuzo ovelayo uthi, kungani pho izinswelaboya zisebenzisa udlame uma kuwukuthi zisuke zizifunela kuphela okokuziphilisa.
Okunye okuxakayo wukuthi uma uqhathanisa namanye amazwe ase-Afrika, abantu bakuleli kabahlupheki kangako. Abantu ababalelwa ku-18 million bathola imali yezibonelelo eqhamuka kuhulumeni njalo ngenyanga, ebasiza ukuxosha ikati eziko.
Emazweni amaningi ase-Afrika kazikho lezi zibonelelo; izakhamizi zakhona ziyafa yindlala, yingakho izinkulungwane zifudukela eNingizimu Afrika ukuzozama impilo engcono. Naphezu kosizi omakhelwane bethu ababhekene nalo, la mazwe awanabo ubugebengu obunodlame njengezwe lethu. Kufanele sizibuze ukuthi kwenziwa yini lokhu.
Kuyaxaka ukuthi esimeni lapho thina singconywana ngokwempilo kunamazwe amaningi, sizithola sisenkingeni yokuba nezinga eliphezulu lobugebengu obunodlame. Ukuqeda lolu dlame kulele kithina uqobo, okusho ukuthi yithina futhi esiyozixazululela inkinga yethu.