Isikhwele sabesifazane kasizwani nomakhalekhikhini babesilisa
SIGUDLA NOGALAKAJANA: ABDUL MILAZI
KUTHIWA omakhalekhikhini se-beyiqedile imishado nemijolo lapha ngaphandle, kanti izi-nkampani ezibakhayo zizama mihla namalanga ukwakha izi-ngidi ezahlukene ukubenza ba-bengobheka mina ngedwa, ko-dwa kunhlanga zimuka nomoya.
Abantu abanomkhuba wokubheka amafoni abantu abathandana nabo, ngabesifazane nama- blesser. Abesifazane sebaphenduka ompetha babaseshi kulokhu, akukhathalekile ukuthi uwukhiyile umakhalekhikhini wakho ngenombolo wena ocabanga ukuthi isinqandamathe sakho ngeke siyicabange.
Uma uke wayikhohlwa nje, uzofika usulindelwe, ubuzwa ukuthi ngubani uBusi, wena uyini naye. Uze ugcine usuthi wena kawukaze umbuze ukuthi laba bantu besilisa abagcwele efonini yakhe yena uyini nabo, ulithathaphi igunya lokufuna wena uchaze ngabesifazane abakweyakho.
Uzibuze futhi ukuthi kungani ekhethe uBusi kubo bonke abesifazane abasefonini, nabo angabazi. Isikhwele sabesifazane sihamba ngemigangatho, uma bebona umuntu abacabanga ukuthi muhle ukwedlula bona, sivuka sime ngezinyawo, ngakho-ke uma bebona izingxoxo zakho kwiWhatsApp, futhi bebona nezithombe zalabo osuke uxoxa nabo, bazokhetha amapatshazi, bese bekubuza ngawo.
Ngeke bakubuze ngalaba ababona ukuthi kabathathi lutho lapha kubo.
Lezi zinsizwa ezikhiya amafoni ngezinombolo zisenkingeni, abesifazane bayazi ukuthi iningi labantu lisebenzisa usuku lokuzalwa, ngakho bazozama olwakho, olwabo, abazali nezingane zakho, baze bayithole le nombolo oyifakile.
Kabanankinga nesikhathi, bangayizama le nombolo kuphele amasonto, ngesikhulu isineke lesi. Ngenxa yokuthi izinombolo zingaqageleka, ikakhulukazi uma umazi kahle umuntu, izinkampani ezakha amafoni zigcine sezenza ukuthi akhiywe ngesithupha.
Phela akekho umuntu ongantshontsha isithupha sakho. Kulezi zinsizwa ezicwila ezimbizeni zikaFaro, izinqandamathe zazo zizilinda zilale uma sezidle kakhulu, zazi kahle ukuthi ngeke zivuke.
Lapho kulula ukuthatha isandla somuntu bese ubeka isithupha sakhe endaweni yaso, vulekiyane ifoni. Uthi ulele wena, umuntu abe epequlula ifoni yakho, efuna abantu besifazane ukuze akulwise ekuseni uma uvuka.
Ungathi uvuka uzwe ubuzwa ukuthi ngubani uLove, kusuke esinamathambo. Bese uyambonisa inombolo ukuthi ngeyakhe, abe esephantsha kuhle kweshubhu ngoba phela yena ubesezimisele ngempi.
Isikhwele phela siyayimisa ingqondo ithi nse, manje amanye amafoni asekhiywa ngobuso, lokhu abathi phecelezi face recognition, kodwa kangiboni yehlukile kunalena yesithupha.
Phela noma udakiwe ubuso bakho kabushintshi. Angayithatha nje akukhombe ngayo, bese iyakubona, ivuleke njalo. Uma wazi ukuthi uyabuhlaba, kuyomele uhambise amaphijama akho ayofakwa iphakethe eliyimfihlo, kumele libe ngaphakathi, futhi lapha emhlane.
Abantu abadakiwe bavame ukulala ngomhlane, ngakho uyothi uma uthathwa wubuthongo botshwala, ulale phezu kwayo ifoni.
Lokhu kuzokusebenzela uma uyinsizwa ngempela eyondlekile, futhi enomkhaba ongangesaka lempuphu, ukuze lona wesifazane ahluleke wukukuphendula.
Phela uma uyisilenda, bayokuphendula kalula nje, besebekhipha umakhalekhikhini kuleli phakethe wena othi liyimfihlo.
Sesingawasola nje amafoni, kodwa into ngempela ebhidliza imizi nemijolo, yisikhwele nje esingaxutshwe nalutho. Isikhwele sasikhona kwakudalo, bengakafiki omakhalekhikhini.
Ungathuka uvuka uzwe ubuzwa ukuthi ngubani uLove, kusuke esinamathambo. Bese uyambonisa ukuthi inombolo ngeyakhe, abe esephantsha kuhle kweshubhu...