SELUSEMOME OLOKUVALWA KWEZICELO ZEMIJAHO YE-KZNA
SELUSEMOME usuku lokuvalwa kokufakwa kwezicelo zokusingatha imijaho yeKwaZulu-Natal Athletics (KZNA) yangonyaka ozayo njengoba kuwuLwesihlanu oluzayo lomhla ka-17 kwephezulu.
Empeleni bekufanele kuvalwe ngomhla ka-30 kuMbasa (April) kodwa isikhathi selulwa ngenxa yeCovid-19. I-KZNA izovala ukufakwa kwezicelo nje, sekusabalele izindaba zokuthi nayo le nhlangano ishayekile ngenxa yeCovid-19. Kuthiwa izisebenzi zihola imali engaphelele.
Ukufaka isicelo somjaho owu10km kubiza u-R1000. Kusuka ku-10km kuya ku-32km wu-R1500 kanti ongaphezulu kuka-32km wu-R2000. I-KZNA esitatimendeni esithumelele abezindaba, ithe iyazi ukuthi isimo esibhekene nomhlaba wonke sibi, kume izinto eziningi emhlabeni. Nokho igcizelele ukuthi kufanele iwaqale amalungiselelo ezinhlelo zangonyaka ozayo.
Kuthiwa ikilabhu ezokube iqala ukufaka isicelo nonyaka ivunyelwe ukusingatha ibanga lika-10km kuphela. Abazokwenza iFun Run kufanele baqinisekise ukuthi umjaho wabo kawunayo imiklomelo yemali.
I-KZNA yamukela izicelo zemijaho yangonyaka ozayo nje, kuzokhumbuleka ukuthi imijaho yanonyaka igcine ukuba khona maphakathi noNdasa (March) yabe seyiphazanyiswa yiCovid-19. I-KZNA izohlangana ngelizayo ukubhunga ukuthi izokwenzenjani ngemali ekhokhwe ngamakilabhu ukuhlela imijaho yanonyaka ebhuntshile.
Abafuna ulwazi oluthe thuthu bangaxhumana noDees Govender ngokumthumelela i-email kwidilesi elithi: dees@kznathletics.co.za noma uMary Booysen kwelithi: mary@kznathletics.co.za.
Abadidiyeli beTotalsports Women’s Race bamemezele ukuthi isikhanseliwe yonke imijaho yabo eba seThekwini, eGoli naseCape Town minyaka yonke. Le mijaho ibizokuba ngokwahlukana kula madolobha ngomhla ka-9 kuNcwaba (August) okuwusuku lwabantu besifazane.