IDowns izovala izikhala 'zamakhehla'
URhulani Mokwena ushaye ibuya kumaSandawana
IMAMELODI Sundowns izongena iqinise emakethe yokuthenga abadlali njengoba kunenqwaba yezethenjwa zale kilabhu esezihanjelwe yiminyaka yobudala.
Lokhu kutshelwe ILANGA nguManqoba “TV” Mngqithi oyisekela likaPitso “Jingles” Mosimane ongumqeqeshi wale kilabhu engagayelwa mphako kwiPremier Soccer League (PSL) njengoba ingajwayele ukuqeda isizini inganqobanga ngisho inkomishi yokubika.
Nakuba uMngqithi engazange ababale ngamagama abadlali bale kilabhu asebebheke ekubekeni amakhokho ethala kodwa phakathi kwabo kukhona ukaputeni uHlompho Kekana oneminyaka ewu-35, u-Anthony Laffor (35), uTebogo Langerman (34), uWayne Arendse (35) ekubeni nonozinti abamqoka bale kilabhu uDenis Onyango noKennedy Mweene sebeneminyaka ewu-35, ukubala nje abambalwa.
Yilesi sizathu-ke esenze le kilabhu yaqala ukubheka abadlali abasebancane njengoba seyisayinise ababili be-Ajax Cape Town, uJody February (24) ongunozinti noGrant Margeman (22) olihlikihla esiswini.
“Laba badlali bazoqala ngokusemthethweni ngesizini ezayo ekilabhini. Sibheke lukhulu kuMargeman noFebruary.
"Bazokwazi ukusisiza ngoba basebancane ngeminyaka yobudala ekubeni nesipiliyoni sikaGeorge Maluleke (31) (abamthathe kwiKaizer Chiefs) sizosidinga kakhulu,” kusho uMngqithi.
Uthe balindele ukuba kushikishe ufudu uma sekuqale imidlalo yokusonga isizini.
“Sizokuba nemidlalo eminingi ecinene njengoba sizoqedela imidlalo ye-Absa Premiership neyeNedbank.
"Sizodinga ukuba nabadlali abavuthiwe ngesizini ezayo ukumelana nanengcindezi yase-Afrika,” kusho lo mqeqeshi.
Uthe kabakabhungi ngabadlali abazobakhulula uma sekusongwe isizini, ezeseka ngokuthi kabazi ukuthi izoqala nini imidlalo njengoba yamiswa isigubhukane ngoNdasa (March) emuva kokubheduka kuleli kweCovid-19 esimandla kakhulu selokhu kuqale uNtulikazi (July), okufakazelwa wukwenyuka ngendlela eyethusayo kwabatholakala benayo.
IDowns iqale ngoMsombuluko ukuzicija njengoba izimisele ngokugudluza iKaizer Chiefs esicongweni uma sekuqale imidlalo.
UMngqithi uthi okungenani badinga amasonto amathathu ukulungiselela ukuqala imidlalo yokusonga le sizini kwazise abadlali sekunesikhathi eside bagcina ukukhahlela ibhola.
Kuzo ezeDowns, imemezele ukushaya ibuya kukaRhulani Mokwena njengelinye lamaphini kaMosimane.
UMokwena washiya iDowns kumasizini amathathu adlule wajoyina i-Orlando Pirates njengephini likaMilutin “Micho” Sredojevic waseSerbia.
Kuthe uma kushiya uMicho kwiBucs, wabanjiswa izintambo zokuqeqesha kodwa samshisa lesi sihlalo okwenza eZimnyama zaqasha uJosef Zinnbauer waseGermany.
UMokwena wabe esebolekiswa kwiChippa United ahlukane nayo emasontweni ambalwa adlule njengoba esevumbuka kwiDowns.
Kulindeleke ukuba aqale umsebenzi maduzane uma sekubuye imiphumela yakhe yokuhlolelwa iCovid-19 kwazise iDowns seyiqalile ukujima.