UMAGAZI ANGASE APHINDE ASEBENZE NOWAYEMQEQESHA KWI-CHIEFS
KUPUTSHUKA izindaba zokuthi uSiyanda “Magazi” Xulu (28) angase ajoyine umqeqeshi owayemlolonga esadlala kwiKaizer Chiefs, uStuart Baxter.
UMagazi usanda kugqabula igoda neMaritzburg United yaseMgungundlovu kanti kuvela izindaba zokuthi angase avumbuke kwi-Odisha FC egijima kwi-Indian Super League. Le kilabhu icijwa nguBaxter osayine inkontileka yeminyaka emibili kuyona.
UPaul Mitchell ongumphathi weSiyavuma Sports Group, emele lo mdlali ebuzwa yiLANGA ngalolu daba lwe-Odisha, uthe uqala ukuluzwa ngaleli phephandaba. Uthi akakaze axhumane noBaxter ngendaba yalo mdlali.
“Njengoba uXulu esanda kuhlukana neTeam of Choice nje, sizama ngakho konke okusemandleni ukumtholela umsebenzi ngokushesha.
"Yiqiniso ukuthi sibheke ngaphakathi eNingizimu Afrika kanjalo naphesheya kwezilwandle kodwa hhayi ukuthi sikhuluma nekilabhu yase-India.
“Phela uSiyanda ungumdlali osezingeni eliphezulu ngakho ngeke kube lukhuni ukumtholela umsebenzi nakuba nesifo seCovid-19 sigadle kwezwakala kuwona wonke amazwe. Sinalo ithemba lokuthi konke kuzohlangana maduzane,” kusho uMitchell ophethe noKeagan Dolly ogijima eFrance.
UBaxter useke waphumela obala ngokuthi uma eqala umsebenzi kuleliya lizwe uzimisele ngokulanda abadlali abathile bakuleli ukuqinisa ngabo ezakhe. Phambilini uMagazi kuvele ukuthi ufunwa yi-Orlando Pirates kuleli.
IChippa United igcine iqashe uLehlohonolo Seema (40) ojoyine le kilabhu ngemuva kokuhlukana neBloemfontein Celtic abeyilolonga.
USeema uzwakalise ukuba nesibindi sokuqala lo msebenzi kule kilabhu edume ngokungasichithi isikhathi ekufakeni amasondo abalolongi.