Uboshelwe esihlahleni, wadutshulwa wafa umlimi
Kunabafana ababili abazenze abadukile, bamgxavuna, bamthandela ngentambo
IGADLA kayikhethi bala eyokuhlaselwa kubulawe abalimi, njengoba ukhihla isililo umndeni kaMnu Mpozana Khumalo (80), waseMuden, ngaseGreytown, oshone ngoLwesihlanu olwedlule emuva kokuboshelwa esihlahleni esisepulazini lakhe, iSpring Water, wadutshulwa kade eyokhaphela izinkomo, izimvu nezimbuzi zakhe.
Indodana kaMnu Khumalo, uMnu Robert Khumalo (54), ishaya indesheni kuhulumeni waseNingizimu Afrika ukuba uyifakele izibuko indaba yokubulawa ngesihluku kwabalimi kuleli zwe.
Kubikwa ukuthi umufi owatholwa ngamalungu omndeni wakhe enamanxeba amabili okudutshulwa, eboshelwe esihlahleni, waphuthunyiswa esibhedlela saseGreytown, sona samdlulisela kwesaseGrey’s eMgungundlovu.
Washonela kwakhe ngoLwesihlanu emuva kokudedelwa esibhedlela iGrey’s. Kuthiwa ngesikhathi ehlaselwa, wayematasa nemfuyo yakhe, kwaqhamuka amabhungu amabili azenza abantu abadukile, ebuza indlela.
Wawayalela kodwa athe esuka, acela ukuthi awaphuzise amanzi. Kuthiwa wangena kwenye yezindlu zakhe egcina amanzi, wawakhelela.
Kwathi uma esewanika amanzi, amgxavuna amthandela esihlahleni ngaphambi kokuba amdubule amahlandla amabili, maqede ashaya achitha.
Indodana yakhe ithe bathole ucingo kumuntu wasendaweni obonile kwenzeka lesi sigameko.
Ithi kubuhlungu ukuthi kungathi benamapulazi amakhulu kangaka, akhiqiza inyama, ubisi nezitshalo ezithunyelwa iNingizimu Afrika yonke, kodwa bese bebhekana nalesi sihlava sokubulawa ngesihluku.
“Sihlaselwa mihla namalanga singabalimi kodwa akukho okutheni uhulumeni wakithi okwenzayo ukusivikela. Sinovalo ukuthi amapulazi amaningi azogcina evalwa ngoba sesiphila ngokwesaba,” kusho uMnu Khumalo.
Uthi bakhona abanye abalimi asebevele bashiya phansi amapulazi abo, bathutha, bahamba ngoba besaba ukugcwelezwa. “Lokhu kukhombisa ukuthi siyiNingizimu Afrika sibheke eweni ngoba uzogcina ushayeka umnotho uma lesi sihlava siqhubeka ngale ndlela ngoba amapulazi amaningi azogcina evaliwe,” kusho uMnu Khumalo.
Uthe amapulazi abo aphakela izitolo ezinkulu okubalwa noWoolworths, Rainbow Chicken neTriple A Beef.
IDemocratic Alliance (DA) KwaZulu-Natal, isigxekile isigameko sokubulawa kukaMnu Khumalo.
UMnu Chris Pappas okhulumela iDA kwezolimo nokuthuthukiswa kwezindawo zasemakhaya esiShayamthetho saKwaZulu-Natal, uthe kuyashaqisa ukuthi kulokhu kuqhubeke njalo ukubulawa kwabalimi nezisebenzi zasemapulazini.
“Isonto nesonto kuba khona isigameko sokuhlaselwa noma ukubulwa komlimi. Sithi uhulumeni mawuqiniseke ukuthi amaphoyisa anezinsizakusebenza ezanele, kukhishwe nezigwebo ezinzima kwabahlasela abalimi kuleli zwe,” kusho uMnu Pappas.
Esitatimendeni esikhishwe wuMnyango wezoLimo kuzwelonke, uNgqongqoshe Thoko Didiza, uzwakalise ukudangala okukhulu ngokubulawa kukaMnu Khumalo.
Uthe bewumnyango bacela noma ngubani ongaba nolwazi ngababuli ukuba avele ukuze bezoboshwa.
“Ngifisa ukudlulisa amazwi enduduzo emndenini wakwaKhumalo, sithi akwehlanga lungehlanga, sengathi umndeni ungalala ngenxeba. Sinxusa zonke izinhlaka zomthetho ukuba zenze konke okusemandleni ukuphenya lolu daba, bese ziyaqinisekisa ukuthi abenzi bobubi baphoswa esitokisini. Ukubulawa komlimi oyedwa noma isisebenzi sezolimo esisodwa, kuyayilimaza kakhulu imboni yezolimo ezweni lethu, ngakho siyafisa ukuthi lezi zigameko zokuhlaselwa kwabalimi nezisebenzi zasemapulazini, ziphele,” kusho uNkk Didiza.
Okhulumela amaphoyisa KwaZulu-Natal, uCol Thembeka Mbele, uthe amaphoyisa aseMuden aphenya icala lokubulawa komuntu emuva kokudutshulwa kowesilisa oneminyaka ewu80 ubudala epulazini lakhe ngabalisa ababili abangaziwa.