BATHUNGATHA
USHAYISANA ngamakhanda umndeni wakwaNgcobo KwaDambuza, eMgungundlovu, ngokunyamalala kwelungu lawo elagcina ukubonakala mhla ka-13 kwephezulu liyohola u-R350 wesibonelelo seCovid-19 eposini lendawo.
ILANGA lithole ukuthi uMnu Nhlakanipho Ngcobo (22), wahola le mali wayozibusisa nabangani bakhe ebusuku.
Ngakusasa ekuseni, abangani bakhe bahambisa izimpahla ayezigqokile emndenini wakhe, bathi uphume ebusuku ngewindi, elalivuliwe,akaziwa ukuthi ukuphi.
Kuthiwa wafika kubangani ‘engumaqumbana’, wagabisela omunye wabo ngo-R950 owawusephaketheni ethi anga-batsheli abanye ukuthi uphethe malini ngoba bazomsaha.
Kuthiwa wayethole neyezinyanga ezimbili ayengayitholanga phambilini. Ekhuluma neLANGA uNkz Lihle Ngcobo ongudadewabo kaMnu Ngcobo, uthe umfowabo akakaze ahambe izinsuku eziningi kangaka.
“Omunye wabangani bakhe ayephuza nabo ngobusuku anyamalala ngabo, uthe uNhlakanipho wafika kuyena wamkhombisa u-R950. Lo mngani uthe kukhona omunye wabo owambona (uNhlakanipho) ukuthi uphethe imali, kwasuka ingxabano ethi akamazisi ngani, balwa.
"Uthe ekulweni kwabo, uNhlakanipho wagcina ewile wazumeka, bamkhiyela endlini bahamba bayophuza, okwathi uma sebebuya, bamfica engasekho, kwacaca ukuthi uphume ngewindi elalivuliwe.
"Bafika nezimpahla ayezigqokile ngesikhathi ephuma lapha ekhaya. Sesikhalela ukuthola ithambo lakhe ukuze sikwazi ukumngcwaba,” kusho uNkz Ngcobo.
UMnu Xolani Ngongoma oyikhansela ku- ward 22 eMsunduzi, ucele abomthetho ukuba baphenye ngoba kuyavela ukuthi uMnu Ngcobo waqala walwa nomunye wabangani bakhe.
Okhulumela amaphoyisa aseMgungundlovu, uSgt Mthokozisi Ngobese, uthe amaphoyisa asePlessislaer athungatha owesilisa okuthiwa wanyamalala kade ehleli nabangani kuphuzwa.