ABDUL MILAZI
ABELUNGU bathi lesi sikhathi sikaKhisimusi ngesobudididi, phecelezi silly season. Basho beqinisile ngoba phela izingqondo ziyayilahla i- network kulezi zinsuku. Uthola abantu sebemosha imali sengathi ikusasa kalikho, nezingane kazibuyeli ezikoleni ngonyaka olandelayo. Abaphathi bamabhizinisi bafuna lokho ngoba nakhu nabo bafuna ukwenza imali, zidle kahle izingane zabo futhi bakwazi nokuzigcina zisezikoleni eziphezulu.
Izikhangiso zikubiza uza lena kude, izibani ziyabhanyaza, ugcina usuthenge wonke uvobe lona, ozowubona ngoMasingana (January) ukuthi empeleni ubungawudingi.
Sisakhula, yizingane ezazihlanyiswa wuKhisimusi. Zazilala zingalele kusukela ngoLwezi (November) ngoba nakhu zazi ukuthi zizodla izibiliboco futhi zithengelwe nezimpahla zokugqoka ezintsha. Igugu lalesi sikhathi lalilikhulu ezindaweni zasemakhaya ngoba phela kwakuphilwa ngemifino nophuthu, kuthi inyama yenkukhu idliwe uma kunesivakashi. Eyenkomo neyembuzi yayidliwa uma kwenziwe umsebenzi.
Uma kunesivakashi, wawuzwa ngoyihlo noma unyoko ethi hamba uyobamba iqhude noma isikhukhukazi esithile. Uzoyixosha inkukhu uze ube mncane. Uthi lapho usuyibona ukuthi isikhathele, imane ingene phansi kwesihlahlanyana sameva. Uzoyijoja ngokhuni ithule nje inganyakazi.
Uthi uyijikijela ngamatshe ingalokothi ukuphuma emeveni, ihlale lapho kuze kuhlwe, uzwe sebekumemeza bethetha ngoba phela kumele ihlatshwe isikhathi sisekhona. Phela ezasekhaya izinkukhu kazivuthwa nje ngokushesha kuhle kolamthuthu. Kazibizwa ama- hardbody ngephutha. Sekuyoze kufike nezingane zakwamakhelwane zikushayise yona ngamatshe, ize iphume isiphuke nephiko.
Kuyothi lapho isiphekiwe, sekuphakwa, nina zingane-ke seniyonikwa amathumbu, inhloko namanqondo. Ngisho kuhlatshwe inkomo kunomsebenzi, izingane zaziphakelwa uphuthu nomhluzi, inyama yayidliwa yizinsizwa nezintombi esezikhulile, abanumzane, omama, amakhehla nezalukazi. Amabhungu ayenikwa iphaphu, alilwele. Abantwana babeze basizwe ngogogo.
Wawuthola isalukazi esesingenamazinyo simfimfitha iqatha, kuthi lapho selimhlophe, uzwe sesimemeza umzukulu waso sithi: “Philani, woza nayi inyama!” Ilithathe-ke ingane ilishutheke ekhukwini lesikhindi sikakhakhi - ukuze abangane bayo bangayiphuci - bese iyolidlela emuva kwendlu.
Nasemalokishini, izingane zazidla amathumbu, amanqina, umqala nenhloko, kuthi umnumzane yena adle uhlangothi lonke. Umama nabanye asebekhulile babecazelana ngalolu olunye uhlangothi. Unemenayithi futhi wawuphuzwa ngabantu abadala.
Namuhla uKhisimusi usuhlanyisa nabantu abadala. Lesi sikhathi sesaphenduka ithuba lokuchomela omakhelwane, kuthi umuntu enengane eyodwa vo, apheke inkukhu, ikalikuni, inyama yemvu neyenkomo.
Angaqedi lapho, athenge izinhlobonhlobo zenyama, esikwa njengesinkwa. Kubhakwe wena khekhe, kwenziwe nezinhlobonhlobo zama- dessert.
Umuntu uthenga isiqandisi esisha, sibe sisasebenza kahle lesi esikhona. Abanye benza amaphathi angapheli, baphuzise bonke abantu. Phela bafuna kukhulunywe ngabo uZibandlela (December) wonke, kuthi uma sekufika uMasingana, uthole abantu sebezixakekisa, beyoboleka imali sengathi bebengazi ukuthi kuzodingeka imali yesikole futhi kumele kulalwe kudliwe ngonyaka omusha. Masiqale ngokubeka imali yezidingo, kuthi esalayo sesingayifaka-ke amanqindi.