Isikhulu soSuthu sichitha ekaBenni
AmaZulu FC amemezele izinguquko ezinqala ekilabhini
UMENGAMELI wamaZulu FC uSandile “The Zunguness” Zungu ( osesithombeni) ucacisa ngekusasa lo mqeqeshi wale kilabhu njengoba kuke kwavela ukuthi ihlongoza ukuqasha uBenni McCarthy obengumqeqeshi weCape Town City.
USuthu luzodudulana neTshakhuma Tsha Madzivhandila (TTM) koweDStv Premiership ngoMgqibelo ngo-18h00 eThohoyandou Stadium, eLimpopo.
USuthu luya kulo mdlalo nje, ngoLwesibili ntambama belunesithangami sabezindaba emahhovisi kaZungu aseSandton, eGoli lapho lumemezele khona izinto ezimqoka.
Lumemezele uPhakamani Mahlambi obekwiMamelodi Sundowns noVeli Mothwa obevimbela iChippa United njengabadlali balo abasha.
Luphinde lwethula uTshepiso Mofokeng esikhundleni sokuba yimenenja jikelele. Ungena endaweni kaLunga Sokhela.
UPhumlani Dube oke wathula ezemidlalo kuKhozi FM nakwiGagasi FM, uqokwe kwesokuba yiCommunity Relations Officer.
UZungu ebuzwa ngoMcCarthy oyamaniswa nezakhe ukuqinisekisile ukuthi u-Ayanda Dlamini usengumqeqeshi wale kilabhu futhi bazoqhubeka nokumeseka nethimba lakhe labaqeqeshi.
“Sengike ngezwa cishe ngabaqeqeshi abayisihlanu abayamaniswa namaZulu kodwa ngiyaqala ukuzwa igama likaMcCarthy.
"Wonke umuntu uyazi ukuthi emdlalweni webhola kufanele ube nokhakhayi oluqinile akufanele wonke amahemuhemu uwafake ekhanda.
"Engingakusho wukuthi ithimba labaqeqeshi hhayi umqeqeshi nje kuphela, kodwa nabasizi bakhe ngisho umqeqeshi wonozinti nethimba lezempilo bayayithokozela indlela esibeseka ngayo.
"Ngesikhathi sibathatha ebuholini obudala bekilabhu, sikubeke kwacaca thina ukuthi wonke umuntu kuzofanele azibonakalise.
"Akukho noyedwa esimbheka ngeso elinezinsolo ngoba nakhu simthathe ebuholini obudala,” kusho uZungu.
Ukubeke kwacaca ukuthi ngeke nangengozi bancetheze uma kukhona abangenzi kahle.
“Uma ungumdlali ungenzi kahle ngeke ube nayo indawo kule kilabhu. Kwamina uqobo kangikho ngaphezulu koSuthu.
"Uma umqeqeshi evimba injabulo yabalandeli abalokhu beyilinde ngesineke kusukela ngo-1932 sizokwenza okufanele, lokho angikuncethezi.
"Sonke simi ngamanzonzwane la ekilabhini,” kuphetha uZungu.