UMQEQESHI WE-ARROWS UKHATHAZEKILE NGABADLALI
UMQEQESHI weLamontville Golden Arrows ukhathazekile ngomsebenzi omuhle owenziwa ngabadlali bakhe athi ugcina usuphelele ezeni.
I-Arrows izokwamukela iSwallows koweDStv Premiership ngoMgqibelo ngo-15h30 eSugar Ray Xulu Stadium, eClermont ngasePinetown.
La makilabhu atholana nje, izinto ziwahambela kahle njengoba engakaze ehlulwe ngale sizini.
UMandla “Mhloli” Ncikazi ololonga i-Arrows uthi iyamkhathaza le nto yokuthi abadlali bakhe bafike basebenze kanzima emdlalweni kodwa bagcine ngokucazelana amaphuzu nezimbangi kungafanele.
“Umqansa uyanyuka ubheke phezulu ayikho ikilabhu elula kwiDStv Premiership.
"Njengamanje-ke kodwa iSwallows ingenye yamakilabhu enza kahle, umdlalo wabo nathi awuzukuba lula. Enye into eyenza ukuthi baqine wukuthi basayine kahle, abadlali abaningi banesipiliyoni sasemakilabhini adlala kwiPSL.
"Mhlawumbe-ke nanokuthi bamgcinile umqeqeshi obanyusele esigabeni esikhulu uBrandon Truter kubenza babe nzima. Ngeke kube ngumdlalo olula ngoba badlala kahle.
"Nohlelo abaludlalayo akulula neze ukuluqonda. Kodwa-ke abakaze behlulwe nathi asikaze sehlulwe. Umehluko nje wukuthi bona banemidlalo eminingi abayinqobile kunathi.
"Kodwa-ke ngiyafisa ukuthi lona siwunqobe singaze saziwe njengabantu abadlala ngokulingana. Abafana bethu bazimisele, benza kahle.
"Into engangijabulisa wukubabona benqoba ngenxa yendlela abasebenza kanzima ngayo. Ngiyakujabulela ukuba phambi kwabo.
"Ngiphatheka kabi uma benganqobi sebezinikele ngendlela abazinikela ngayo. Angikholwa ukuthi ikhona ikilabhu kwiPSL esebenza kanzima ukudlula abafana bethu,’’ kusho uNcikazi.
Uthi babambe umoya ngoSiyabonga Dube noZolani Nkambole abanokuthinteka.
Uthi bazoqhubeka nokubahlola ukuze babone ukuthi bazoba yingxenye yini yalo mdlalo.
Uthi uDevine Lunga obedonsa isigwebo sekhadi elibomvu uyabuya.
Imidlalo yeDStv Premiership isiyonke ngale mpelasonto imi kanje: NGOMGQIBELO ESugar Ray Xulu: Golden Arrows vs Swallows 15h30.
ECape Town Stadium: Cape Town City vs Pirates 15h30.
EThohoyandou: Tshakhuma vs AmaZulu 18h00.
EHarry Gwala: Maritzburg United vs Mamelodi Sundowns 20h15. NGESONTO EMbombela Stadium: TS Galaxy vs Stellenbosch 15h30.
EPeter Mokaba: Baroka vs Chippa United 15h30.