'Udlise umshana (4) ama-ARVs wamdlwengula wambulala'
Kuthiwa uqale wayiphuzisa iphilisi ingane, wabe eseyidlwengula
USHIYE amalungu omndeni wakhe nawomphakathi ezibuza eziphendula ngesizathu sokudlwengula abulale umshana wakhe ngoLwesibili owesilisa (44) waseTshaneni, eMkhuze okuthiwa uqale wamphuzisa iphilisi lakhe lokuthithibalisa isandulela-ngculaza.
Umsolwa okuthiwa udlwengule wabulala ingane kamzala wakhe uBandile ‘Handa’ Nyaweni (4), kuthiwa emuva kwalesi sigameko ushaye utshani, okuthe uma amalungu omphakathi embamba, embuza ukuthi uyenzeleni into embi kangaka, wathi kunesizathu esinqala esiholele kulokhu, nokho agcine engasishongo.
Unina kaBandile, uNkz Nombuso Mthembu (35), uveze ukuthi kusenzima ukwamukela ukuthi indodana yakhe ibulawe ngumzala wakhe - esiligodlile igama lakhe aze avele enkantolo - emuva kwalokho isidumbu sayo wasifihla endlini yakhe.
Uthi ubizwe ngelinye ilungu lomndeni liyomtshela ukuthi kukhona okushaya amanzi abangakuqondi okwenzeka endlini kamsolwa, bambona ephuma engena egcwele igazi ezandleni. Babona sengathi kukhona isidumbu sengane ngemuva komnyango wendlu yakhe.
Uthi ushaywe wuvalo oluyisimanga, baqonda endlini kamsolwa bamfica ehleli yedwa kumnyama. Kuthe uma bembuza ukuthi iphi ingane, wabayalela ukuthi uma befuna ukukhuluma naye mabangene endlini.
Bakhanyise ngomakhalekhukhwini babona igazi ligcwele phansi naye egcwele igazi ezandleni, isidumbu sengane simbozwe ngezingubo zakhe phansi.
“Bengisetohweni ngesikhathi kwenzeka lesi sigameko. Ngitshelwe ukuthi umsolwa ubizele ingane yami endlini yakhe idlala nezinye izingane egcekeni ngezithuba zantambama. Kuzwakale umsindo wengane ikhala, uphuma ngasendlini yakhe okusolise amalungu omndeni ukuthi kukhona akwenza kuyona.
“Kuthe ngemuva kwesikhathi sekuqala ukuhwalala, umsindo wengane usuthule, wabonakala ephuma endlini yakhe izandla zigcwele igazi. Ubuzwe ngelinye ilungu lomndeni ukuthi iphi ingane, wabhoka ngolaka wathi akayazi, mayiyobhekwa endlini kaninakhulu qede wabuyela endlini yakhe.
“Kuthiwa uqede ukuyibulala wahlala nesidumbu sayo endlini wangageza ngisho igazi ebeligcwele izandla, obekukhombisa ukuthi akazisoli, futhi akakufihli ukuthi ingane uyibulele.
“Sithole ukuthi uqale wayiphuzisa iphilisi lakhe lokuthithibalisa isandulela-ngculaza, wabe eseyinukubeza ngaphambi kokuyigwaza amanxeba amabili entanyeni,” kusho uNkz Mthembu.
Uthi ubuye emsebenzini ekhathele wanganaka ukuthi kayikho ingane egcekeni, wazitshela ukuthi isadlala nezinye ngoba ibikukhonzile ukudlala ize ibuye sekuhwalele, kwesinye isikhathi bayibuyise ngoba isilele.
Uchaze umsolwa njengomuntu obezithanda izingane, ejwayele ukudlala nazo, kwesinye isikhathi azibize ahlale nazo endlini yakhe, aziphe imali yokuthenga amaswidi.
Uthi akekho umuntu abexabene naye egcekeni ukuthi ubesengaze abulale ingane ngesihluku esingaka.
Okhulumela amaphoyisa KwaZulu-Natal, uCol Thembeka Mbhele, uthe amaphoyisa avule icala lokubulala kuboshwe owesilisa ohlobene nomufi okulindeleke ukuba avele enkantolo maduze. ngecala lokubulala.