BAZOSHAYEKA ABATHANDI BOTSHWALA EZINDAWENI OKUBHOKE ICOVID-19
BANGASE baphinde bashayeke abadla amanzi amponjwana ezindaweni ezizohlonzwa njengalezo okubhoke kuzona iCoronavirus njengoba iNational Coronavirus
Command Council (NCCC) ebihlangene ngoLwesibili iphakamise ukuthi izinsuku nezikhathi zokudayiswa kwamambawu zizoshintsha.
Ngaphandle kokushintsha kwezinsuku zotshwala, okuzovumeleka ukuba budayiswe ngoMsombuluko kuya kuLwesine, nesikhathi sokugcaluza kwabantu sizoshintsha.
Ngeke kudingeke muntu emgwaqweni emuva kuka-22h00. INCCC ithi izindawo zokucima ukoma nezindawo zokudla zizovunyelwa ukusebenza kusukela ekuseni zivale ngo-21h00 uma le mithetho kugcina kuvunyelwana ngayo.
Iphakamise nokuthi ukuphuzwa kotshwala kufanele kuvalwe ezindaweni zomphakathi njengasemabhishi nasemapaki, kuphinde kwehliswe nesibalo sabantu abahambela imicimbi sibe wu-100 - ezindaweni lapho libhoke khona igciwane.
Izindawo okuthiwa yizo okwamanje ezihamba phambili ngokuba nesibalo esiphezulu sabahaqekile kubalwa i-Eastern Cape neWestern Cape. INCCC iphakamise lo-khu nje, iSekelameya kuMasipala waseNelson Mandela Bay, e-Eastern Cape, uMnu Thsonono Buyeye belisanda kuveza izibalo ezethusayo zabantu ababulawa yiCovid-19 - edalwa yiCoronavirus - ngaphansi kwalo masipala.
“Emahoreni awu24, kufe abantu abawu-17 eNelson Mandela Bay nje iyodwa. Abantu abawu-14 bafe ezibhedlela ezizimele kwathi abathathu bafa kwezikahulumeni.
“Esibhedlela iLife Mercantile, kushone abawu-10, eSt Georges bawu-4 kwathi eDora Nginza kwafa abathathu,” kusho uMnu Thsonono.
Imithombo ebingaphakathi emhlanganweni weNCCC, ithe makhulu amathuba okuthi uma kuvunyelwana ngale migomo, iqale ukusebenza eNelson Mandela Bay nezinye izingxenye ze-Eastern
Cape naseWestern Cape bese kuthi ezinye izifundazwe ziqhubeke nesigaba sokuqala sokuvalwa kwezwe. Izinto ezifana nemicimbi yokwesula izinyembezi ( after tears), zingase zivalwe thaqa ezindaweni ezithathwa njengezihamba phambili ngabathelelekayo. Okunye okukhathaze kakhulu abebekulo mhlangano, ikakhulukazi e-Eastern Cape, kuthiwa wukwanda koqhibukhowe bezikole zokusoka. Kuthiwa kuzotshalwa amathimba ezempilo, amaphoyisa nezinduna abazogada lo mkhuba. Silobe izolo ngoLwesithathu isacutshungulwa le migomo ephakanyiswe yiNCCC emhlanganwe-ni wePresidential Coordinating Council ehlanganisa ondunankulu, izimeya nezithunywa eziqhamuka komasipala. Kuzothi uma sebevumelene, uMengameli Cyril Ramaphosa ethule inkulumo esizweni ezoba nayo yonke le mithetho.