Liboshiwe iphoyisa 'elidlwengule isiboshwa'
Lona wesifazane ubeboshelwe icala lokuntshontsha izimpahla zokugqoka
LITHELE umbutho wamaphoyisa ngechilo iphoyisa (43) lasesiteshini samaphoyisa aseSikhaleni, eMpangeni, eliboshwe ngozakwabo lisemsebenzini - lifake umfaniswano - ngezinsolo zokudlwengula isiboshwa sesifazane ebesingaphakathi esitokisini ngoLwesihlanu ebusuku.
Leli phoyisa - ILANGA elinalo igama lalo, esingeke silidalule lize livume noma liphike icala - kuthiwa ligila lona wesifazane nje, beliqeda ukumvalela ezitokisini ngezinsolo zokweba izimpahla esitolo.
ILANGA lithole ukuthi amaphoyisa abizwe mayelana nowesifazane obanjwe entshontsha izimpahla zokugqoka enxanxatheleni yezitolo eSikhaleni.
Kuthiwa iphoyisa linikele endaweni yesigameko lihamba nomunye uzakwabo. Bamshaqile umsolwa, okuthe uma befika esiteshini leli phoyisa lambhalisa.
Kuthiwa emuva kokufakwa kwalona wesifazane esitokisini, leli phoyisa libuyele kuyena selihamba lodwa, lamthatha lamlutha ngokuthi limyisa ekhishini leziboshwa, lafike lamdlwengulela khona liphindelela. Liqede lapho lambuyisela esitokisini, lamsabisa ngokuthi uma eke waxoxa ngelikwenze kuyena, lizokwenza ukuba angayinuki ibheyili, abhadle esitokisini aze agwetshwe.
Kuthiwa lo wesifazane ukushaye indiva ukusatshiswa yileli phoyisa, wababikela abaphathi balo ngokunukubezwa kwakhe. Icala livulwe ngaleso sikhathi, laboshwa iphoyisa lisagqoke umfaniswano wezakwasidlodlo.
ILANGA lithole ngomthombo walo ongaphakathi esiteshini saseSikhaleni - osidonse ngendlebe ukuba singawudaluli - ukuthi leli phoyisa belingaqali ukugila isiboshwa.
“Yinto yakhe ukunukubeza iziboshwa zesifazane azisabise ngokuthi uma zike zamceba, uzozivalela zingabe zisaphuma noma azi-thembise ukuthi uzozitholela ibheyili.
“Siyasincoma lesi siboshwa esibe nesibindi sayibika le nto ngoba ibikhulunyelwa phansi, kungekho ofuna ukuphumela obala ngayo ngenxa yokuthi bebungekho ubufakazi,” kusho umthombo.
Okhulumela amaphoyisa KwaZulu-Natal, uCol Thembeka Mbhele, ukuqinisekisile ukuboshwa kwaleli phoyisa. Uthe livelile ngoMsombuluko enkantolo, icala lahlehlela umhla ka-7 kuZibandlela (December) ukuba liyofaka isicelo sebheyili.