Bathukutheliswa ngosezibiza ngenkosi yakwaMkhwanazi
UNcube uthi walicela ngezinkomo eziwu-9 iwisa ababebabambele lona
IBONDENE esizweni sakwaMkhwanazi, KwaMpukunyoni, eMtubatuba njengoba sekuvuke owesilisa wakwaNcube othi uyinkosi yakule ndawo, wafaka izithombe zakhe ezinkundleni zokuxhumana eneSilo sikaZulu, uZwelithini kaBhekuzulu, wabhala ukuthi wayeyothola izibusiso kusona njengenkosi yakoMzilankatha.
Kubikwa ukuthi lolu daba seluze lwayiswa naseMnyangweni wezokuBusa ngokubambisana nezoMdabu KwaZulu-Natal, njengoba abaKhwanazi, abaholwa yibambabukhosi, uSolomon Mkhwanazi, bengafuni nakuyizwa eyalona wesilisa onguMnu Qiniso Ncube.
Kuthiwa uMnu Ncube wayephakanyiswe ukuba abambe isikhundla sobuduna eKhula Village, emuva kokuba kwadutshulwa kwabulawa uMnu Madodenzani Mkhwanazi ngasekuqaleni kwalo nyaka, okunguyena owayephethe lesi sigodi.
Umthombo uthi wayebanjiswa nje uMnu Ncube, vele kwakuhloswe ukuthi kubekwe yena njengenduna emuva kokwenziwa kwehlambo likaMnu Mkhwanazi.
Emuva kokuya kwakhe eNdlunkulu kaZulu, kuthiwa ngeledlule kusuke umsindo esefuna ukubeka izinduna zakhe.
Phakathi kwezigodi okuthiwa abakwaNcube bathi ngezabo, kubalwa iDukuduku, iNkundusi, KwaShikishela, eKhula Village, eMfekaye naseSt Lucia.
Okhulumela isizwe sakwaMkhwanazi uMntwana uSiboniso Mkhwanazi, uthe bafisa umnyango ungenelele njengoba abakwaNcube beqhubeka nokufuna ukudla ubukhosi bakwaMkhwanazi, babeke nezinduna zabo.
"Emuva kokuba (uMnu Ncube) esephakanyisiwe ukuba abheke isigodi, wathatha umndeni wakhe waya KwaNongoma wabuya esethi ugcotshwe yiSilo. Uqalile wafuna ukubeka izinduna zakhe.
"Emasontweni amabili edlule, inkosi yabiza umhlangano, imemezela ukuthi iyamehlisa esikhundleni sokubheka iKhula Village.
"Sithe sizwa, kwathiwa uyobeka induna eDukuduku, esingazi ukuthi ukwenza ngaliphi,” kusho yena.
UMnu Ntuthuko Mkhwanazi ongundunankulu wesizwe, uvumile ukuthi uMnu Ncube ubethulwe esigungwini senduna eyashona. Uthe bathukile uma esezibiza ngeNkosi.
“Ngisho ungabheka amaminithi omhlangano lapho kwakuzocelwa ukuba sibeke yena, akukho lapho kwakhulunywa khona indaba yobukhosi.
"Sambeka ukuba abheke lesi sigodi ngoba emlandweni, ukhona owakwaNcube owake waba yinduna ngaphansi kweNkosi uMtubatuba. Sithukile-ke esezibiza ngenkosi, sekusabalele izithombe eshuthe neSilo,” kusho yena.
Ucele isizwe sabaKhwanazi ukuba sehlise imimoya, wathi uma abakwaNcube bethi banobukhosi, mabalandele umthetho bangaqhamuki sebebeka izinduna endaweni yakwaMkhwanazi.
Ethintwa uMnu Ncube, uthe banamanga abakwaMkhwanazi uma bethi uzibiza ngenkosi ngoba uyiyona uqobo inkosi yamaZilankatha, futhi uzitholile izibusiso eSilweni.
Uthe wazihambisa izinkomo eziwu-9 kwaMkhwanazi eyocela iwisa ababebabambele lona.
“Emuva kokuba sihambise izinkomo eziwu-9, saya eSilweni siyocela izibusiso. ISilo sasinika izibusiso, kanti manje simatasa nohulumeni ngodaba lobukhosi bakwaNcube.
"Uma kuwukuthi abakwaMkhwanazi izinkomo esabanikeza zona kabazidlulisanga kwabanye, lokho akuyona indaba yethu. Thina sinesibusiso esivela eSilweni futhi siyasihlonipha kakhulu.
"Ngikhuluma nje kukhona abakwaMkhanazi abafikile ngoLwesibili, basho ukuthi bayasihlonipha isibusiso seSilo esinikezwe sona,” kusho yena.
Okhulumela umnyango, uMnu Senzelwe Mzila, uthe kabukho ubukhosi bakwaNcube kuleya ndawo.
“Ngokomthetho, ubukhosi obukuleya ndawo ngobakwaMkhwanazi kanti umnyango uyalusebenza lolu daba,” kusho yena.
Okhulumela iNdlunkulu KaZulu, uMntwana uThulani Zulu, uthe uma umuntu efuna ukubuyisa ubukhosi, kunemigudu elandelwayo ngohlelo lukahulumeni.
Uthi iSilo siyaye sigcobe umuntu osuke ephakanyiswe wuhulumeni.